کراچی: کورنگی میں شہریوں نے ڈاکو مارڈالا-ساتھی گرفتار

کراچی(اسٹاف رپورٹر)کورنگی میں عوام نے لوٹ مار کرنے والے ڈاکو کو گولی مارنے کے بعد بہمیانہ تشدد کا نشانہ بناکر ہلاک کردیا، جبکہ فرار ہونے والے ملزم کو پولیس نے گرفتارکرلیا ۔جبکہ دوسری جانب پولیس نے شہر کے مختلف علاقوں میں مبینہ مقابلوں کے دوران 9ملزمان کو زخمی حالت میں گرفتارکرکے اسلحہ اور مسروقہ سامان برآمدکرلیا ۔

تفصیلات کے مطابق کورنگی کے علاقے ڈھائی نمبر راجپوتانہ اسپتال کے قریب لوٹ مار کرنے والے ایک ملزم کو عوام نے پکڑلیا اور تشدد کا نشانہ بنانا شروع کردیا اس ہی دوران ایک شہری نے ڈاکو کو گولی ماردی ، اس اطلاع پر پولیس موقع پر پہنچی اور مشتعل افراد کو منتشرکرتے ہوئے زخمی حالت میں ملزم کو اپنی تحویل میں کرلیا اورجناح اسپتال لے جانے کی کوشش کی تاہم راستے میں دم توڑ گیا ، اس حوالے ایس ایچ اوملک عامر نے بتایاکہ مذکورہ واقعہ اتوار اور پیر کی درمیانی شب پیش آیا تھا ، پولیس نے ہلاک ہونے والے ڈاکو کا ساتھی جو کہ موقع سے فرار ہوگیا تھا اس کو بھی گرفتارکرکے اسلحہ برآمد کرلیا۔

گرفتار ملزم کی شناخت حبیب الرحمان کے نام سے ہوئی جبکہ ہلاک ہونے والے ڈاکو کی شناخت محمد عبداللہ کے نام سے ہوئی جو کہ قائد آباد گل احمد مل کے قریب علاقے کا رہائشی تھا۔ پولیس کے مطابق ہلاک ڈاکو کا تاحال کرائم ریکارڈ سامنے نہیں آسکا ہے،تاہم واقعے کا مقدمہ تاحال درج نہیں کیا جاسکا ہے، پولیس گولی مارنے والی شہری کو تلاش کررہی ہے تاہم اسکے بعد مقدمہ درج کیا جائے گا ۔ اے وی سی سی پولیس نے گلشن معمار تھانے کی حدود بند مراد روڈ منگھو پیر میں مبینہ مقابلے کے بعد 2 ملزمان ولی ولد علی محمد اور نادر علی ولد رب نواز کو زخمی حالت میں گرفتارکرکے قبضے سے ایک نائن ایم ایم پستول ،ایک 30 بور پستول بمعہ راو نڈ برآمد کر لیے،جبکہ زخمیوں کواسپتال منتقل کر دیا گیا۔شاہراہ نورجہاں پولیس نے نارتھ ناظم آباد کے بلاک( ٹی) میں مبینہ مقابلے کے دوران ایک ملزم جہانزیب ولد محمد اکبر کوزخمی حالت میں گرفتارکرلیا،ملزم کا ساتھی موقع سے فرار ہوگیا، پولیس نے زخمی ملزم کے قبضے سے ایک ٹی ٹی پستول سمیت را ؤنڈز اور ایک موٹرسائیکل برآمد کر لی، زخمی ملزم کواسپتال منتقل کر دیا گیا۔

سچل پولیس نے مدینہ کالونی میں مبینہ پولیس مقابلے کے دوران ایک ملزم شیراز ولد شریف اللہ کو زخمی حالت میں گرفتار کرلیا، تاہم اس کا ساتھی موقع سے فرار ہونے میں کامیاب ہوگیا،پولیس نے زخمی ملزم کے قبضے سے ایک ٹی ٹی پستول سمیت گولیاں برآمد کر کے زخمی ملزم کواسپتال منتقل کر دیا۔سائٹ سپر ہائی وے صنعتی ایریا پولیس نے سبزی منڈی کے قریب مبینہ پولیس مقابلے کے دوران 2 ملزمان زاہد ولد نور محمد اور یاسین ولد علی کو زخمی حالت میں گرفتارکرکے قبضے سے ایک ٹی ٹی پستول معہ راؤنڈز اور ایک موٹرسائیکل برآمد کر کے زخمی ملزم کوطبی امداد کے لیے اسپتال منتقل کردیا۔ پولیس زخمی حالت میں گرفتار تمام ملزمان سے مزید چھان بین کررہی ہے ۔کورنگی سنگر چورنگی کے قریب پولیس نے مبینہ مقابلے کے بعد زخمی حالت میں ملزم عمران کو گرفتا ر کرکے اسلحہ برآمد کرلیا ،علاوہ ازیں ملیر سٹی پولیس نے ولایت شاہ مزار کے قریب مبینہ مقابلے کے بعد زخمی حالت میں دو ملزمان ندیم اور نادر علی کو گرفتار کرکے اسلحہ برآمد کرنے کا دعوی کیا ۔