کورنگی تھانے میں آتشزدگی،درجنوں موٹرسائیکلیں جل گئیں

کراچی(اسٹاف رپورٹر)

کورنگی تھانے میں آگ لگنے سے احاطے میں کھڑی کیس پراپرٹی کی درجنوں موٹرسائیکلیں اور مشینری جل کر خاکستر ہوگئی۔

کورنگی تھانے کے  احاطے میں موجود  کیس پراپرٹی کی 100 سے زائد موٹرسائیکلوں میں آگ بھڑک اٹھی جس نے دیکھتے ہی دیکھتے شدت اختیار  کرلی۔ آتشزدگی کی اطلاع ملتے ہی فائر بریگیڈ کا عملہ موقع پر پہنچا اور سخت جدوجہد کے بعد آگ پر قابو پالیا۔

فائربریگیڈ حکام کے مطابق کورنگی تھانے کے احاطے میں بے ہنگم طریقے سے ایک کے اوپر ایک  رکھی ہوئی موٹر سائیکلوں میں لگنے والی آگ کو ایک گھنٹے کی سخت جدوجہد کے بعد مکمل طور پر بجھا دیا  گیا جبکہ فائر بریگیڈ کے عملے نے وہاں موجود دیگر گاڑیوں و موٹر سائیکلوں کے علاوہ تھانے کے مال خانہ اور عمارت کو بھی جلنے سے بچالیا

انھوں ںے بتایا کہ تھانے کے احاطے میں 100 سے زائد موٹر سائیکلیں تھیں جبکہ وہاں پر قبضے میں لی گئی گٹکا بنانے کی 20 سے زائد مشینیں بھی رکھی ہوئی تھیں۔ آگ لگنے سے درجنوں موٹرسائیکلیں اور گٹکا بنانے کی مشینیں جل کر خاکستر ہوگئیں۔

کورنگی تھانے کے ڈیوٹی افسر اے ایس آئی اظہر خان نے بتایا کہ خوش قسمتی سے کوئی جانی نقصان نہیں ہوا جبکہ فوری طور پر آگ لگنے کی وجہ کا تعین نہیں ہو سکا، اس حوالے سے پولیس مزید تحقیقات کر رہی ہے۔