تین ہٹی پل کے نیچے سے 9 منشیات فروش گرفتار-تھانیدار معطل

کراچی(اسٹاف رپورٹر)ڈسٹرکٹ سینٹرل میں منشیات فروشی کے ہاٹ اسپاٹ پر ٹاسک فورس نے چھاپہ مار کارروائی کرکے 2عورتوں سمیت 9منشیات فروشوں کو گرفتار کرلیا،جب کہ سپرمارکیٹ تھانے کا ایس ایچ او عہدے سے فارغ کردیا گیا۔

تفصیلات کے مطابق شہر میں منشیات فروشی کے متعدد ہاٹ اسپاٹ موجود ہے،جہاں پولیس کارروائیوں سے مسلسل گریزاں ہے۔میڈیا نشاندہی پر ٹاسک فورس کے ممبر ایس پی لیاقت آباد ایاز حسین نے لیاقت آباد میں تین ہٹی کے قریب پل کے نیچے پولیس کی بھاری نفری کے ہمراہ کارروائی کی۔منشیات فروشوں کی موجودگی اور بلاخوف استعمال دیکھ کر پولیس افسران دھنگ رہ گئے۔

پولیس نے 2 منشیات فروش عورتوں سمیت 9 ملزمان شیلہ،کیلم عرف مریم،عطاءاللہ،محمد علی ،محمد سہیل ،محمد ،ذیشان ،محسن اور جیون کو گرفتارکرکے بھاری مقدار میں منشیات برآمد کرلی،جبکہ نشے کی کئی عادی افراد کو فلاحی ادارے کے حوالے بھی کیا۔ٹاسک فورس کی کارروائی پر ایس ایس پی ڈسٹرکٹ سینٹرل رانا معروف عثمان نے ایس ایچ او سپر مارکیٹ زاہد سومرو کو معطل کرکے انکوائری کا حکم دے دیا۔