کراچی : گاڑی کی ٹکر سے نوجوان۔چھت سے گرکرضعیف شخص جاں بحق

کراچی(اسٹاف رپورٹر)شہر قائد میں ٹریفک حادثات میں ایک نوجوان جاں بحق اور پولیس اہلکار زخمی ہوگیا، چھت سے گرکر ضعیف شخص چل بسا،گارڈن اور بلدیہ کے علاقوں سے نشے کے عادی سمیت 2 افراد کی لاشیں ملیں۔تفصیلات کے مطابق سرجانی ٹاؤن کے علاقے تیسر ٹاؤن سیکٹر35 امام بارگاہ کے قریب نامعلوم گاڑی کی ٹکر سے ایک نوجوان جاں بحق ہوگیا،جس کی لاش پولیس نے عباسی شہیداسپتال منتقل کی،فوری طور متوفی کی شناخت نہیں ہوسکی،

اس کی عمر20سال کے قریب بتائی جاتی ہے،پولیس نے کارروائی کے بعد لاش ورثاءتلاش کیلئے سردخانے منتقل کردی۔ادھرگڈاپ سٹی کے علاقے سپر ہائی وے کباب جی ہوٹل کے قریب نامعلوم گاڑی کی ٹکر سے موٹرسائیکل سوار 25 سالہ پولیس اہلکار ساگر زخمی ہوگیا،جسے طبی امدا دکیلئے عباسی شہید اسپتال لایا گیا،مضروب تھانہ جمشید کوارٹرزمیں تعینات ہے۔

علاوہ ازیں کھارادر کے علاقے چھٹن شاہ درگاہ کے قریب واقع ایک گھر کی چھت سے پراسرار طور پر گرکر55 سالہ شخص جاں بحق ہوگیا،جس کی لاش کوسول اسپتال منتقل کیا گیاجہاں متوفی کی شناخت عارف ولد ابراہیم کے نام سے ہوئی،اس حوالے سے پولیس مزیدجانچ کررہی ہے۔قبل ازیں گارڈن کے علاقے گارڈن لیاری ایکسپریس وے پل کے قریب فٹ پاتھ سے50 سالہ نشے کے عادی شخص کی لاش ملی،جسے پولیس نے سول سپتال بعدازاں کارورائی کے بعد لاش سردخانے میں رکھوا دی۔

اس کی عمر 50سال کے قریب بتائی جاتی ہے ۔بلدیہ ٹاؤن بلدیہ 12نمبر کے قریب سڑک سے 55 سے 60 سالہ شخص کی لاش ملی، جسے پولیس نے تھانے اور بعدازاں ضروری کاروائی کے بعد سردخانے منتقل کردی،فوری طور پرلاش کی شناخت اور وجہ موت معلوم نہیں ہوسکی۔