کراچی: گلستان جوہر میں ڈاکو شہریوں کے ہتھے چڑھ گیا، دوسرا فرار

کراچی (اسٹاف رپورٹر) گلستان جوہر کے علاقے رابعہ سٹی کے قریب لوٹ مارنے کرنے والے ڈاکوؤں پر شہری نے فائرنگ کر دی جس کے نتیجے میں ایک ڈٓاکو شدید زخمی ہو کر موٹر سائیکل سے گر گیا جسے پولیس نے گرفتار کرلیا جبکہ دوسرا ساتھی موقع سے فرار ہوگیا۔ ایس ایچ او شارع فیصل ملک مرتضیٰ نے بتایا کہ زخمی ڈاکو کے سر پر گولی لگی ہے جسے تشویشناک حالت میں جناح اسپتال منتقل کر دیا گیا ہے جبکہ اس کے قبضے سے اسلحہ برآمد ہوا ہے۔

علاقے سے ملنے والی اطلاعات کے مطابق فائرنگ سے دوسرا ڈاکو بھی زخمی ہونے کا بتایا جا رہا ہے۔ ڈاکو موٹر سائیکل سوار میاں بیوی سے لوٹ مار کے بعد فرار ہو رہے تھے جس مقام پر واقعہ پیش آیا وہاں انڈر پاس بننے کی وجہ سے سڑک ٹوٹ پھوٹ کا شکار ہے۔

علاوہ ازیں سچل پولیس نے سویرا چوک کے قریب مبینہ مقابلے کے دوران ایک ڈاکو زخمی حالت میں گرفتار کرلیا۔ پولیس کے مطابق ڈکیت کی شناخت عبدالکریم کے نام سے کی گئی جس کے قبضے سے پستول ، گولیاں اور 2 موبائل فونز برآمد ہوئے ہیں ، گرفتار ڈکیت کو طبی امداد کے لیے اسپتال منتقل کر دیا گیا جبکہ پولیس اس کا کرمنل ریکارڈ چیک کر رہی ہے۔