شرپسند عناصر کی کوشش ناکام،راولاکوٹ اور مظفرآباد میں معمولات زندگی بحال

راولاکوٹ۔ آزاد کشمیر کے شہر راولاکوٹ میں سیکیورٹی اداروں کے مطابق کالعدم ایکشن کمیٹی سے منسوب عناصر کی جانب سے امن و امان کی صورتحال خراب کرنے کی کوشش کی گئی، تاہم قانون نافذ کرنے والے اداروں کی بروقت کارروائی کے باعث صورتحال کو کنٹرول کر لیا گیا۔

حکام کے مطابق 7 جون کی شام بعض شرپسند عناصر نے علاقے میں بدامنی پھیلانے کی کوشش کی، جسے فوری طور پر ناکام بنا دیا گیا۔ سیکیورٹی اداروں نے علاقے میں امن و امان برقرار رکھتے ہوئے صورتحال کو معمول پر بحال کر دیا۔

انتظامیہ کے مطابق راولاکوٹ میں تعلیمی، کاروباری اور سماجی سرگرمیاں معمول کے مطابق جاری ہیں اور شہری اپنی روزمرہ مصروفیات میں مصروف ہیں۔ بازار، دفاتر اور دیگر ادارے کھلے رہے جبکہ ٹریفک کی روانی بھی برقرار رہی۔

آزاد کشمیر پولیس اور دیگر قانون نافذ کرنے والے ادارے علاقے میں امن و امان کے قیام اور شہریوں کے جان و مال کے تحفظ کے لیے متحرک ہیں۔

دوسری جانب مظفرآباد سمیت آزاد کشمیر کے دیگر شہروں میں بھی زندگی معمول کے مطابق جاری رہی۔ تعلیمی ادارے، کاروباری مراکز اور دفاتر کھلے رہے جبکہ شہریوں کی بڑی تعداد اپنی روزمرہ سرگرمیوں میں مصروف رہی۔ شہری حلقوں کے مطابق مجموعی طور پر خطے میں حالات پرامن اور معمول کے مطابق ہیں۔