قطر نے بیشتر سمندری سرگرمیاں عارضی طور پر معطل کر دیں،ایرانی حملوں کی مذمت

خلیجی خطے میں بڑھتی ہوئی کشیدگی کے پیش نظر قطر نے احتیاطی اقدام کے طور پر بیشتر سمندری سرگرمیاں عارضی طور پر معطل کر دی ہیں۔ ساتھ ہی دوحہ نے ایران سے منسوب حملوں کی شدید مذمت کرتے ہوئے انہیں اپنی خودمختاری اور بین الاقوامی قوانین کی خلاف ورزی قرار دیا ہے۔

قطری وزارتِ ٹرانسپورٹ کے مطابق عوام کے تحفظ کو مدنظر رکھتے ہوئے تفریحی کشتیاں، ماہی گیری کی کشتیاں، جیٹ اسکیز اور دیگر چھوٹی سمندری گاڑیوں کی نقل و حرکت اگلے حکم تک روک دی گئی ہے۔

وزارت نے واضح کیا کہ بین الاقوامی بحری قوانین کے تحت چلنے والے تجارتی اور بین الاقوامی جہاز اس پابندی سے مستثنیٰ ہوں گے اور وہ متعلقہ ضوابط کے مطابق اپنی سرگرمیاں جاری رکھ سکیں گے۔

حکام نے شہریوں اور کشتی مالکان سے اپیل کی ہے کہ وہ سرکاری ہدایات پر مکمل عمل کریں اور کسی بھی نئی پیش رفت کے بارے میں معلومات صرف سرکاری ذرائع سے حاصل کریں۔

دوسری جانب قطر کی وزارتِ خارجہ نے ایران سے منسوب حملوں کی سخت الفاظ میں مذمت کرتے ہوئے کہا ہے کہ یہ کارروائیاں قطر کی خودمختاری، علاقائی سالمیت اور بین الاقوامی قانون کے منافی ہیں۔

وزارتِ خارجہ کے بیان میں کہا گیا ہے کہ حالیہ واقعات خطے کے امن و استحکام کے لیے خطرات بڑھا سکتے ہیں۔ قطر نے اس صورتحال پر تشویش کا اظہار کرتے ہوئے سفارتی ذرائع سے کشیدگی کم کرنے، فوری جنگ بندی اور مذاکرات کی بحالی پر زور دیا ہے۔

تجزیہ کاروں کے مطابق خلیجی خطے اور آبنائے ہرمز میں جاری کشیدگی کے باعث بحری تجارت، توانائی کی ترسیل اور علاقائی سلامتی سے متعلق خدشات میں اضافہ ہوا ہے، جس کے پیش نظر خطے کے ممالک حفاظتی اقدامات کو مزید مؤثر بنا رہے ہیں۔