آزاد کشمیر الیکشن: دوسرے مرحلے میں ن لیگ کا پلڑا بھاری،12 نشستوں پر کامیابی،پیپلز پارٹی 4 سیٹیں جیت سکی

آزاد کشمیر قانون ساز اسمبلی کے انتخابات کے دوسرے مرحلے میں مسلم لیگ (ن) نے نمایاں برتری حاصل کرتے ہوئے اب تک 12 نشستوں پر کامیابی حاصل کرلی ہے، جبکہ پاکستان پیپلز پارٹی 4 نشستیں اپنے نام کرنے میں کامیاب رہی ہے۔ کئی حلقوں کے نتائج مکمل ہوچکے ہیں، جبکہ بعض مقامات پر ووٹوں کی گنتی کا عمل جاری ہے۔

دوسرے مرحلے میں مظفرآباد ڈویژن کے 8 انتخابی حلقوں اور مہاجرین کی 12 نشستوں پر پولنگ ہوئی۔ بیشتر علاقوں میں ووٹنگ کا عمل پرامن ماحول میں مکمل ہوا، تاہم حلقہ ایل اے 27 میں خراب موسم اور لینڈ سلائیڈنگ کے باعث انتخابی عملہ اور پولنگ سامان بروقت نہ پہنچ سکا، جس کے باعث حلقے کے تمام 196 پولنگ اسٹیشنوں پر انتخابات ملتوی کر دیے گئے۔

ابتدائی غیرحتمی اور غیرسرکاری نتائج کے مطابق مسلم لیگ (ن) نے مہاجرین کی نشستوں سمیت مختلف حلقوں میں واضح برتری حاصل کی، جبکہ پیپلز پارٹی نے بھی چند حلقوں میں کامیابی سمیٹی۔

مظفرآباد ڈویژن کے حلقہ ایل اے 30 مظفرآباد 4 سے مسلم لیگ (ن) کے مصطفیٰ بشیر عباسی کامیاب قرار پائے۔ اسی طرح ایل اے 35 جموں 2 سے چودھری محمد اسماعیل، ایل اے 36 جموں 3 سے محمد احسن رضا، ایل اے 37 جموں 4 سے مریم جاوید، ایل اے 41 کشمیر ویلی 2 سے محمد عامر شاہ، ایل اے 42 کشمیر ویلی 3 سے سید شوکت علی شاہ، ایل اے 43 کشمیر ویلی 4 سے محمد یاسین لون اور ایل اے 44 کشمیر ویلی 5 سے محمد احمد رضا قادری نے کامیابی حاصل کی۔

دوسری جانب پاکستان پیپلز پارٹی نے ایل اے 45 کشمیر ویلی 6 سے عبدالماجد خان کو کامیاب کرایا، جبکہ ایل اے 40 کشمیر ویلی 1 اور ایل اے 26 نیلم ویلی 2 سمیت بعض حلقوں میں بھی پیپلز پارٹی کے امیدوار ابتدائی نتائج میں برتری حاصل کیے ہوئے ہیں۔

ادھر ایل اے 25 نیلم ویلی 1، ایل اے 34 جموں 1، ایل اے 38 جموں 5 اور ایل اے 39 جموں 6 میں بھی ابتدائی نتائج کے مطابق مسلم لیگ (ن) کے امیدوار آگے ہیں، تاہم ان حلقوں کے حتمی نتائج کا اعلان ابھی باقی ہے۔

الیکشن حکام کے مطابق جن حلقوں میں ووٹوں کی گنتی جاری ہے، وہاں نتائج مکمل ہونے کے بعد سرکاری اعلان کیا جائے گا، جبکہ مجموعی صورتحال میں مسلم لیگ (ن) دوسرے مرحلے میں سب سے بڑی جماعت بن کر سامنے آتی دکھائی دے رہی ہے۔

دوسرے مرحلے کے اہم نتائج