مظفرآباد کے انتخابی نتائج سامنے آگئے، ایل اے 27 پر ن لیگ اور ایل اے 28 پر پیپلز پارٹی کامیاب

آزاد جموں و کشمیر قانون ساز اسمبلی کے دوسرے مرحلے کے انتخابات کے غیر سرکاری اور غیر حتمی نتائج کے مطابق مظفرآباد ڈویژن کے دو اہم حلقوں میں مسلم لیگ (ن) اور پاکستان پیپلز پارٹی نے کامیابی حاصل کر لی ہے۔

حلقہ ایل اے 27 مظفرآباد ون میں مسلم لیگ (ن) کی امیدوار نورین عارف کامیاب قرار پائیں، جبکہ ایل اے 28 مظفرآباد ٹو سے پاکستان پیپلز پارٹی کے امیدوار بازل علی نقوی نے میدان مار لیا۔

موسمی صورتحال اور لینڈ سلائیڈنگ کے باعث ان دونوں حلقوں کے 57 پولنگ اسٹیشنز پر 2 اگست کو پولنگ ملتوی کر دی گئی تھی، جس کا انعقاد بعد میں کیا گیا۔

ایل اے 27 مظفرآباد ون کے مکمل غیر سرکاری نتائج کے مطابق مسلم لیگ (ن) کی نورین عارف نے 18 ہزار 919 ووٹ حاصل کر کے کامیابی حاصل کی۔ ان کے مدمقابل استحکام پاکستان پارٹی کے سردار تبارک علی 18 ہزار 621 ووٹ لے کر دوسرے نمبر پر رہے۔

دوسری جانب حلقہ ایل اے 28 مظفرآباد ٹو میں پاکستان پیپلز پارٹی کے بازل علی نقوی نے 28 ہزار 170 ووٹ حاصل کیے اور کامیابی اپنے نام کی۔ مسلم لیگ (ن) کے امیدوار چوہدری شہزاد 26 ہزار 864 ووٹ لے کر دوسرے نمبر پر رہے۔

مظفرآباد ڈویژن کے 21 حلقوں کے نتائج کے مطابق مسلم لیگ (ن) سب سے بڑی جماعت بن کر سامنے آئی ہے، جس نے 15 نشستیں حاصل کیں، جبکہ پاکستان پیپلز پارٹی نے 6 نشستوں پر کامیابی حاصل کی۔

انتخابی نتائج کے مطابق مظفرآباد ڈویژن میں سیاسی مقابلہ سخت رہا، تاہم مسلم لیگ (ن) نے واضح اکثریت کے ساتھ برتری برقرار رکھی جبکہ پیپلز پارٹی بھی اہم نشستیں حاصل کرنے میں کامیاب رہی۔