جمائما اور برطانوی حکومت عمران خان کی ضمانت دیں گے،انگریزی اخبار کا دعویٰ

پاکستان تحریک انصاف کے ایک سینئر رہنما نے دعویٰ کیا ہے کہ عمران خان کی ممکنہ بیرون ملک منتقلی کے حوالے سے بعض حلقوں کی جانب سے ضمانت سے متعلق کوششیں جاری ہیں، تاہم سابق وزیراعظم نے تاحال اس حوالے سے کوئی آمادگی ظاہر نہیں کی۔

انگریزی اخبار ڈان سے گفتگو میں پی ٹی آئی رہنما نے نام ظاہر نہ کرنے کی شرط پر بتایا کہ عمران خان کی سابق اہلیہ جمائما گولڈ اسمتھ، ان کے بیٹوں اور برطانوی حکومت کو ضامن بنانے کی کوشش کی جا رہی ہے۔

رہنما کے مطابق مبینہ طور پر یہ شرط زیرِ غور ہے کہ اگر عمران خان کو برطانیہ منتقل کیا جاتا ہے تو وہ وہاں کسی قسم کا سیاسی بیان جاری نہیں کریں گے۔ تاہم ان کے بقول عمران خان نے اس تجویز پر رضامندی ظاہر نہیں کی۔

پی ٹی آئی رہنما نے مزید کہا کہ پارٹی میں بعض افراد کو امید تھی کہ موجودہ حالات میں عمران خان کے اہل خانہ کو ان سے ملاقات کی اجازت مل جائے گی، لیکن ملاقات سے انکار نے ان امیدوں کو متاثر کیا ہے۔

انہوں نے دعویٰ کیا کہ عمران خان نے یہ مؤقف اختیار کیا ہے کہ انہیں اسپتال منتقل کیا جائے یا کسی اور جگہ، وہ لانگ مارچ کی کال سے پیچھے نہیں ہٹیں گے۔ ان کے مطابق اگر عمران خان کو اسپتال منتقل کیا گیا تو چند روز بعد انہیں دوبارہ جیل منتقل کیے جانے کا امکان بھی زیرِ بحث ہے۔

پی ٹی آئی رہنما نے کہا کہ جو لوگ حالات میں بہتری کی توقع کر رہے تھے، انہیں موجودہ صورتحال کے تناظر میں محتاط رہنا چاہیے۔ تاہم ان کے یہ تمام دعوے پارٹی رہنما کے بیان پر مبنی ہیں اور آزادانہ طور پر ان کی تصدیق نہیں ہوسکی۔