سانحہ پمز نرسری، ڈاکٹر انیزہ جلیل 4 ماہ کے لیے معطل

پاکستان انسٹی ٹیوٹ آف میڈیکل سائنسز (پمز) نرسری میں پیش آنے والے آتشزدگی کے واقعے کے بعد انتظامی کارروائیوں کا سلسلہ تیزی سے جاری ہے۔ وزارت قومی صحت نے سانحے کے تناظر میں پمز کی اسسٹنٹ پروفیسر جنرل میڈیسن ڈاکٹر انیزہ جلیل کو 120 روز کے لیے معطل کر دیا ہے۔

سرکاری دستاویز کے مطابق، وزارتِ قومی صحت کی جانب سے جاری کردہ نوٹیفکیشن میں بتایا گیا ہے کہ یہ اقدام وزیراعظم پاکستان کی ہدایت اور انکوائری کمیٹی کی سفارشات کی روشنی میں اٹھایا گیا ہے۔ نوٹیفکیشن کے متن کے مطابق، سول سرونٹس ایفیشنسی اینڈ ڈسپلن رولز 2020 کے رول 5 کے تحت ڈاکٹر انیزہ جلیل کو فوری طور پر معطل کیا گیا ہے اور یہ معطلی اگلے احکامات تک نافذ العمل رہے گی۔

باخبر ذرائع کا کہنا ہے کہ پمز نرسری سانحے کی تحقیقات کا دائرہ کار وسیع کر دیا گیا ہے، اور اس افسوسناک واقعے کے حوالے سے مزید متعلقہ افسران اور دیگر عملے کے خلاف بھی سخت محکمانہ کارروائی متوقع ہے۔