راولپنڈی کے علاقے میں گھر سے یونیورسٹی طالبہ کی پھندا لگی لاش برآمد

راولپنڈی کے تھانہ نصیر آباد کی حدود میں واقع اعوان ٹاؤن کے ایک گھر سے علامہ اقبال اوپن یونیورسٹی کی ایک طالبہ کی پھندا لگی لاش برآمد ہوئی ہے۔ پولیس حکام کے مطابق مقتولہ کے بھائی نے واقعے کی اطلاع دی کہ اس کی بہن کمرے میں سوئی ہوئی تھی اور صبح کے وقت جب دیکھا گیا تو وہ دوپٹے کے ذریعے پنکھے سے لٹکی ہوئی تھی۔

پولیس ذرائع اور ابتدائی بیانات کے مطابق اہل خانہ نے دعویٰ کیا ہے کہ لڑکی نے مبینہ طور پر خودکشی کی ہے۔ تاہم واقعے کی اطلاع ملتے ہی پولیس موقع پر پہنچ گئی اور تمام ضروری فرانزک شواہد اکٹھے کرنے کے بعد لاش کو قانونی کارروائی اور پوسٹ مارٹم کے لیے اسپتال منتقل کر دیا گیا۔

پولیس کا کہنا ہے کہ یہ واقعہ خودکشی ہے یا اس کے پیچھے کوئی اور قانونی یا مجرمانہ معاملہ کارفرما ہے، اس حتمی صورتحال کا انکشاف مکمل فرانزک رپورٹ اور پوسٹ مارٹم کی رپورٹ موصول ہونے کے بعد ہی ہو سکے گا۔ پولیس نے واقعے کی ہر پہلو سے تفتیش شروع کر دی ہے۔