وفاقی محتسب کی مداخلت سے سرگودھا اور ملتان کے درمیان ساندل ایکسپریس بحال

اسلام آباد (نیوز ڈیسک) وفاقی محتسب نوید کامران بلوچ کی مداخلت کے نتیجے میں پاکستان ریلوے نے سرگودھا اور ملتان کے درمیان چلنے والی ساندل ایکسپریس کو طویل عرصے کے بعد دوبارہ بحال کر دیا ہے۔ اس ٹرین کی بحالی سے سینکڑوں قصبوں اور دیہات کے عوام میں خوشی کی لہر دوڑ گئی ہے۔

دفتر وفاقی محتسب کے جاری کردہ اعلامیے کے مطابق، پاکستان ریلوے نے کچھ عرصہ قبل سرگودھا اور ملتان کے درمیان چلنے والی یہ ٹرین بند کر دی تھی، جس کی وجہ سے عوام الناس بالخصوص طلبا، ملازم پیشہ اور کاروباری افراد کو روزمرہ کے سفر میں شدید مشکلات کا سامنا کرنا پڑ رہا تھا۔ علاقے کے مکین مسلسل ریلوے حکام سے ٹرین کی بحالی کی درخواستیں کر رہے تھے تاہم کہیں کوئی شنوائی نہیں ہو رہی تھی۔

مصدقہ دستاویزات کے مطابق 24 مئی کو سلانوالی کے ایک رہائشی محمد رمضان نے سرگودھا میں وفاقی محتسب کے علاقائی دفتر میں ٹرین کی بحالی کے لیے باضابطہ درخواست جمع کروائی تھی۔ علاقائی دفتر کے انچارج خواجہ سیف الرحمان نے فوری کارروائی کرتے ہوئے راولپنڈی اور ملتان سے ریلوے حکام کو طلب کیا اور کیس کی باقاعدہ سماعت کی۔ سماعت کے دوران محکمہ ٹرین کی بندش کے حوالے سے کوئی بھی تسلی بخش جواب پیش کرنے سے قاصر رہا۔

ریلوے حکام نے مؤقف اختیار کیا تھا کہ ٹرین کی بحالی کا اختیار پاکستان ریلوے ہیڈکوارٹرز لاہور میں ریلوے ٹریفک کے دفتر کے پاس ہے، جس کے بعد یہ معاملہ ہیڈکوارٹرز میں اٹھایا گیا۔ تفصیلی سماعت اور خط و کتابت کے بعد وفاقی محتسب نے عوامی مفاد کو مدنظر رکھتے ہوئے ساندل ایکسپریس کو فوری طور پر بحال کرنے کے احکامات جاری کیے۔

وفاقی محتسب کے احکامات پر عملدرآمد کرتے ہوئے پاکستان ریلوے نے بالآخر ملتان اور سرگودھا کے درمیان مسافر ٹرین کا سفر دوبارہ شروع کر دیا ہے۔ 21 اگست 2026ء کو جب ساندل ایکسپریس مسافروں کو لے کر ملتان سے سرگودھا پہنچی تو ریلوے اسٹیشن پر موجود عوام نے اس پر مسرت اقدام کا پرجوش خیرمقدم کیا۔