مکہ مکرمہ پر ڈرون حملے کی کوشش نا قابل قبول ہے، وزیراعظم شہباز شریف

اسلام آباد (نیوز ڈیسک) وزیراعظم محمد شہباز شریف نے مکہ مکرمہ پر ڈرون حملے کی کوشش کی سخت ترین الفاظ میں مذمت کرتے ہوئے واضح کیا ہے کہ حرمین شریفین کا امن اور تقدس ایک ایسی سرخ لکیر ہے جسے کسی صورت عبور نہیں کیا جا سکتا۔ سماجی رابطے کی ویب سائٹ پر جاری کردہ اپنے ایک بیان میں وزیراعظم نے کہا کہ مقدس شہر مکہ مکرمہ پر ڈرون حملے کی کوشش نے دنیا بھر کے مسلمانوں میں شدید غم و غصہ پیدا کیا ہے، اور کوئی بھی مسلمان ایسے گھناؤنے اقدام کا تصور تک نہیں کر سکتا۔

وزیراعظم شہباز شریف نے اپنے بیان میں اس بات کا اعادہ کیا کہ پاکستان ہمیشہ کی طرح اپنے برادر سعودی عوام کے ساتھ مکمل یکجہتی کے ساتھ کھڑا ہے۔ انہوں نے کہا کہ خطے میں امن کے لیے ہماری پُرعزم وابستگی مکہ مکرمہ میں برادر ممالک سعودی عرب، ترکیہ اور پاکستان کے درمیان طے پانے والے تاریخی مشترکہ دفاعی معاہدے سے بھی بالکل عیاں ہوتی ہے۔

وزیراعظم نے مزید وضاحت کی کہ یہ اتحاد کسی بھی ملک کے خلاف نہیں ہے بلکہ اس کا بنیادی مقصد خطے کے دفاع، سلامتی، استحکام اور امن کے فروغ کے لیے ایک مؤثر اجتماعی عزم کی نمائندگی کرنا ہے۔ حکومتِ پاکستان نے خطے میں امن و امان کی صورتحال پر گہری تشویش کا اظہار کرتے ہوئے سعودی عرب کی سالمیت کے تحفظ کے لیے بھرپور حمایت کا یقین دلایا ہے۔