یمن میں سرکاری فورسز کے آپریشن فجرِ یمن کے دوران 950 حوثی جنگجو ہلاک

یمن کی بین الاقوامی طور پر تسلیم شدہ حکومت نے دعویٰ کیا ہے کہ اس کی فورسز نے ایران کے حمایت یافتہ حوثی گروپ کے خلاف مختلف محاذوں پر 1,879 فوجی کارروائیاں کیں، جن کے دوران 950 حوثی جنگجو ہلاک اور 380 فوجی گاڑیاں تباہ یا ناکارہ بنا دی گئیں۔

رپورٹس کے مطابق، یمنی مسلح افواج کے سرکاری ترجمان کرنل مجید النزیلی نے ایک بیان میں بتایا کہ یہ کارروائیاں جاری فوجی آپریشن ’’ڈان آف یمن‘‘ کے تحت کی گئیں۔ اس مہم کے دوران جنگی طیاروں، ڈرونز، توپ خانے، راکٹ لانچرز اور سنائپر یونٹس کی مدد سے حوثی ملیشیا کے عسکری اہداف کو نشانہ بنایا گیا، جس سے ان کے فائرنگ کے ذرائع خاموش ہوئے اور کمانڈ اینڈ کنٹرول کے نظام میں افراتفری پیدا ہوئی۔

فوجی ترجمان کے مطابق کارروائیوں میں حوثیوں کے ٹھکانوں، کمانڈ سینٹرز، اسلحہ ڈپو، قلعہ بندیوں اور دیگر دفاعی تنصیبات کو نشانہ بنایا گیا۔ تعز میں فضائی حملوں کے دوران حوثی ملیشیا کی کمک اور جنگجوؤں کے دستوں کو بھی نشانہ بنایا گیا جس سے ان کے اجتماعات منتشر ہوگئے۔ عسکری انجینئرنگ یونٹس بحال کیے گئے علاقوں کو بارودی سرنگوں سے پاک کرنے میں مصروف ہیں تاکہ انہیں محفوظ بنایا جا سکے۔

تاہم، ہلاک ہونے والے جنگجوؤں اور تباہ شدہ گاڑیوں سے متعلق یمنی حکومت کے ان دعوؤں کی آزاد ذرائع سے تصدیق نہیں ہو سکی ہے، جبکہ حوثی گروپ کی جانب سے بھی فوری طور پر کوئی ردعمل سامنے نہیں آیا ہے۔