بنوں میں نامعلوم افراد کے تشدد سے پولیس اہلکار جاں بحق، کراچی میں 2 افراد جاں بحق
سفاکانہ حملے، ملزمان فرار ہوگئے، پولیس نے تلاش شروع کردی۔
بنوں میں نامعلوم افراد کے تشدد سے پولیس اہلکار جاں بحق، کراچی میں 2 افراد جاں بحق
خیبر پختونخوا کے ضلع بنوں کے علاقے تازیری چوک میں نامعلوم افراد نے ایک پولیس اہلکار پر شدید تشدد کیا، جس کے نتیجے میں وہ موقع پر ہی جاں بحق ہوگیا۔ پولیس حکام کے مطابق واقعے کے بعد ملزمان فرار ہونے میں کامیاب ہوگئے جن کی تلاش کے لیے چھاپے مارے جا رہے ہیں جبکہ جاں بحق ہونے والے اہلکار کی لاش کو قانونی کارروائی اور ضابطے کی کارروائی کے لیے قریبی اسپتال منتقل کردیا گیا ہے۔
دوسری جانب کراچی کے مختلف علاقوں میں پیش آنے والے پرتشدد اور ہلاکت خیز واقعات میں ایک خاتون سمیت 2 افراد جاں بحق جبکہ 1 شخص شدید زخمی ہوگیا۔ ریسکیو ذرائع کے مطابق شہر قائد کے علاقے سفورا غازی گوٹھ جی 17 بس اسٹاپ کے قریب ایک گھر میں زہریلی چیز کھانے سے 32 سالہ صائمہ جاں بحق ہوگئی، جن کی لاش کو فوری طور پر اسپتال منتقل کیا گیا۔
ادھر محمود آباد کے جونیجو ٹاؤن میں خلفائے راشدین مسجد کے قریب پیش آنے والے ایک اور پرتشدد واقعے میں تیز دھار آلے یعنی چھری کے وار سے 1 شخص جاں بحق جبکہ دوسرا شدید زخمی ہوگیا۔ پولیس اور فلاحی اداروں کے عملے نے واقعے کی اطلاع ملتے ہی مقتول کی لاش اور زخمی شخص کو طبی امداد کے لیے جناح اسپتال منتقل کر دیا جہاں زخمی کا علاج جاری ہے۔ متعلقہ تھانے کی پولیس نے تمام واقعات کا مقدمات درج کرکے تفتیش کا آغاز کر دیا ہے اور شواہد اکٹھے کیے جا رہے ہیں۔