اسلام آباد کے علاقے بہارہ کہو میں شادی پر جانے والے خاندان کا گھر لٹ گیا

اسلام آباد کے نواحی علاقے بہارہ کہو میں شادی کی تقریب میں شرکت کے لیے جانے والے ایک خاندان کو اس وقت شدید مالی نقصان کا سامنا کرنا پڑا جب نامعلوم چور ان کے گھر کے تالے توڑ کر لاکھوں روپے مالیت کے زیورات اور دیگر قیمتی سامان چوری کرکے فرار ہوگئے۔ پولیس ذرائع کے مطابق یہ واردات گزشتہ روز پیش آئی، جہاں ملزمان نے موقع کا فائدہ اٹھاتے ہوئے گھر کا صفایا کردیا۔

پولیس کے مطابق چوری کی اس واردات کے دوران ملزمان گھر سے 20 تولے سے زائد سونے کے زیورات، نقدی، 7 موبائل فون اور دیگر قیمتی اشیا اڑا لے گئے۔ متاثرہ خاندان کے مطابق چوری ہونے والے تمام سامان کی مجموعی مالیت ایک کروڑ روپے سے زائد بنتی ہے۔

واقعے کی اطلاع ملنے کے بعد تھانہ بہارہ کہو میں نامعلوم ملزمان کے خلاف مقدمہ درج کرلیا گیا ہے اور تفتیش کا آغاز کر دیا گیا ہے۔ تاہم، ایف آئی آر کے متن اور پولیس ذرائع کے مطابق تاحال ملزمان کا کوئی سراغ نہیں مل سکا ہے اور نہ ہی کسی قسم کی گرفتاری عمل میں آئی ہے۔

دوسری جانب متاثرہ خاندان نے پولیس کی تفتیشی کارکردگی پر شدید تحفظات کا اظہار کرتے ہوئے الزام عائد کیا ہے کہ مقدمہ درج ہونے کے باوجود تفتیش میں روایتی تاخیر کا مظاہرہ کیا جا رہا ہے جس کی وجہ سے وہ شدید ذہنی اذیت اور پریشانی کا شکار ہیں۔ متاثرہ افراد نے اعلیٰ حکام سے پرزور مطالبہ کیا ہے کہ چوری شدہ سامان کی فوری برآمدگی یقینی بنائی جائے اور اس واردات میں ملوث ملزمان کو جلد از جلد قانون کے کٹہرے میں لایا جائے۔