بلوچستان کے ضلع چاغی میں تھانے پر حملہ، عمارت دھماکے سے اڑا دی

بلوچستان کے ضلع چاغی کے دور افتادہ علاقے یک مچ میں نامعلوم مسلح افراد نے تھانہ یک مچ پر حملہ کر کے بھاری دھماکا خیز مواد سے تھانے کی عمارت کو مکمل طور پر تباہ کر دیا ہے۔ تھانہ یک مچ کے ایس ایچ او کے مطابق یہ واقعہ صبح تقریباً ساڑھے چار بجے پیش آیا جب مسلح افراد نے تھانے پر دھاوا بول دیا۔

پولیس ذرائع کے مطابق حملہ آوروں نے تھانے پر قبضہ کرنے کے بعد وہاں دھماکا خیز مواد نصب کیا، جس کے نتیجے میں ہونے والے شدید دھماکے سے عمارت ملبے کا ڈھیر بن گئی۔ تاہم خوش قسمتی سے اس واقعے میں کوئی جانی نقصان نہیں ہوا اور تمام پولیس اہلکار محفوظ رہے۔

دوسری جانب سیکیورٹی ذرائع نے تصدیق کی ہے کہ حملے کے دوران یک مچ بازار میں نصب متعدد سیکیورٹی کیمروں کو بھی فائرنگ کر کے نشانہ بنایا گیا اور انہیں تباہ کر دیا گیا۔ واضح رہے کہ یک مچ تھانہ این-40 شاہراہ پر کوئٹہ تفتان تجارتی راستے پر واقع ہے، جو کہ ضلع چاغی کا ایک حساس اور دور دراز علاقہ مانا جاتا ہے۔

واقعے کی اطلاع ملتے ہی پولیس اور قانون نافذ کرنے والے سیکیورٹی اداروں نے فوری طور پر علاقے کو گھیرے میں لے لیا اور شواہد اکٹھے کرنے کا آغاز کر دیا۔ حکام کے مطابق ملزمان کی تلاش کے لیے علاقے میں سخت سرچ آپریشن جاری ہے جبکہ تاحال کسی کالعدم یا عسکری گروپ نے اس حملے کی ذمہ داری قبول نہیں کی ہے۔ چاغی اور گردونواح میں گزشتہ مہینوں کے دوران بھی سرکاری تنصیبات کو نشانہ بنانے کے متعدد واقعات پیش آ چکے ہیں، جن کے بعد انتظامیہ نے علاقے میں سیکیورٹی کے انتظامات کو مزید سخت کر دیا ہے۔