خواجہ آصف کا پی ٹی آئی کو مشورہ، سوشل میڈیا کے اثر سے نکلنے پر زور

اسلام آباد: وزیر دفاع خواجہ آصف نے کہا ہے کہ پاکستان تحریک انصاف کی قیادت اگر سوشل میڈیا کے اثر سے باہر نکل کر سیاست کرے تو یہ جماعت کے لیے بہتر ثابت ہوگا۔

پارلیمنٹ ہاؤس میں جیو نیوز سے گفتگو کرتے ہوئے خواجہ آصف کا کہنا تھا کہ مولانا فضل الرحمان کے بیانات پر وہ پہلے ہی سیاسی تنقید کر چکے ہیں، تاہم مسلم لیگ (ن) کے کسی دوسرے رہنما کی مولانا کے بارے میں گفتگو پر تبصرہ نہیں کرنا چاہتے۔

وزیر دفاع نے کہا کہ سیاست میں واپسی کے تمام راستے کبھی بند نہیں ہوتے۔ سیاسی حالات بدلتے رہتے ہیں اور جو لوگ آج ایک دوسرے کے مخالف ہیں، وہ کل سیاسی اتحادی بھی بن سکتے ہیں۔

خواجہ آصف کے مطابق پی ٹی آئی کے اندر سے بھی ایسی آوازیں سامنے آ رہی ہیں کہ مزاحمت کے بجائے سیاسی عمل کو ترجیح دی جانی چاہیے۔ ان کا کہنا تھا کہ اگر پی ٹی آئی سیاسی سرگرمیوں پر توجہ دے تو اسے سیاست میں مزید گنجائش مل سکتی ہے۔

انہوں نے ایک بار پھر زور دیا کہ پی ٹی آئی قیادت کو سوشل میڈیا کے اثر سے نکل کر سیاسی حکمت عملی اپنانی چاہیے، جو جماعت کے سیاسی مستقبل کے لیے فائدہ مند ہو سکتی ہے۔