صارفین کی نجی تصاویر تک غیر قانونی رسائی، اٹلی کا میٹا پر کروڑوں ڈالر کا جرمانہ

اٹلی کی ڈیٹا پروٹیکشن اتھارٹی نے سوشل میڈیا پلیٹ فارم فیس بک کی مالک کمپنی میٹا کے خلاف سخت کارروائی کرتے ہوئے 88 کروڑ 70 لاکھ ڈالر کا بھاری جرمانہ عائد کر دیا ہے۔ غیر ملکی میڈیا رپورٹس کے مطابق یہ کارروائی صارفین کی نجی تصاویر اور ویڈیوز تک بغیر اجازت رسائی حاصل کرنے کے معاملے پر کی گئی ہے۔

دستاویزات اور جاری کردہ رپورٹس کے مطابق فیس بک کی اینڈرائیڈ ایپ کے ذریعے صارفین کے موبائل فونز میں محفوظ نجی تصاویر اور ویڈیوز تک غیر مجاز رسائی حاصل کی جا رہی تھی۔ یہ متنازع فیچر صارفین کو ان کی ذاتی میڈیا فائلز سوشل میڈیا پلیٹ فارم پر شیئر کرنے کی تجاویز فراہم کرتا تھا۔ اطالوی حکام کا کہنا ہے کہ کمپنی کی جانب سے صارفین کو اس رسائی کے بارے میں مناسب اور واضح آگاہی فراہم نہیں کی گئی تھی، جس سے 2 کروڑ سے زائد افراد متاثر ہوئے۔

اطالوی اتھارٹی نے میٹا کو حکم دیا ہے کہ وہ آئندہ 2 ماہ کے اندر اس متنازع فیچر کو خودکار طور پر بند کر دے۔ اس کے علاوہ مستقبل میں کسی بھی ایسے فیچر کے استعمال سے پہلے ہر صارف سے واضح اور صریح اجازت لینا لازمی قرار دیا گیا ہے۔