چینی صدر شی جن پنگ کا جوہری ہتھیاروں کے مکمل خاتمے کا مطالبہ
اہم سفارتی پیش رفت، ایٹمی جنگ سے گریز پر زور، تینوں بڑی طاقتوں کے درمیان ملاقات۔
چینی صدر شی جن پنگ کا جوہری ہتھیاروں کے مکمل خاتمے کا مطالبہ
بیجنگ (نیوز ڈیسک) چین کے صدر شی جن پنگ نے جوہری ہتھیاروں پر مکمل پابندی عائد کرنے اور انہیں یکسر ختم کرنے پر زور دیا ہے۔ ان کا کہنا ہے کہ دنیا کو ایٹمی ہتھیاروں سے پاک بنانے کے لیے مشترکہ کوششیں کی جانی چاہئیں۔
بین الاقوامی خبر رساں ادارے رائٹرز کی رپورٹ کے مطابق چینی صدر نے امریکی صدر ڈونلڈ ٹرمپ اور روسی صدر ولادیمیر پیوٹن کے ساتھ ایک اہم ملاقات میں عالمی امن اور سلامتی کے امور پر تبادلہ خیال کیا۔ اس موقع پر انہوں نے اس عزم کا اظہار کیا کہ جوہری جنگ نہ تو کبھی جیتی جا سکتی ہے اور نہ ہی اسے کبھی لڑا جانا چاہیے۔
چینی سرکاری خبر رساں ادارے شنہوا کے مطابق صدر شی جن پنگ نے اس بات پر زور دیا کہ عالمی سطح پر جوہری جنگ کے کسی بھی ممکنہ خطرے کو ٹالنے کے لیے تمام فریقین کو فوری اور مؤثر اقدامات اٹھانے چاہئیں۔ ان کے مطابق جوہری ہتھیاروں کے خاتمے اور جامع پابندیوں کے ذریعے ایک ایسی پرامن دنیا کی بنیاد رکھی جانی چاہیے جو اس مہلک خطرے سے آزاد ہو۔
یہ اعلیٰ سطحی سفارتی رابطہ ایسے وقت میں سامنے آیا ہے جب دنیا کی 3 بڑی ایٹمی طاقتیں ایک ہی میز پر موجود تھیں۔ سکیورٹی ماہرین کے مطابق عالمی سطح پر ان ممالک کے درمیان اس نوعیت کا اتفاق رائے دنیا بھر میں پائیدار امن کے قیام کے لیے کلیدی حیثیت رکھتا ہے۔