زرمبادلہ ذخائر میں تاریخی اضافہ، وزیراعظم شہباز شریف کا اظہار تشکر

اسلام آباد: وزیراعظم شہباز شریف نے اسٹیٹ بینک آف پاکستان کے زرمبادلہ کے ذخائر 21.4 ارب ڈالر کی ریکارڈ سطح تک پہنچنے پر اللہ تعالیٰ کا شکر ادا کرتے ہوئے اسے ملکی معیشت کے لیے اہم پیش رفت قرار دیا ہے۔

اسٹیٹ بینک کے مطابق 11 ستمبر 2026 کو مرکزی بینک کے زرمبادلہ کے ذخائر 21.389 ارب ڈالر تک پہنچ گئے تھے، جو اس کی تاریخ کی بلند ترین سطح ہے۔ اسی ہفتے پاکستان کے مجموعی مائع زرمبادلہ ذخائر 26.8 ارب ڈالر تک پہنچ گئے۔

وزیراعظم شہباز شریف نے کہا کہ زرمبادلہ کے ذخائر میں اضافہ معاشی ٹیم کی مسلسل محنت اور ملکی معیشت کو درست سمت میں آگے بڑھانے کے لیے کیے گئے اقدامات کا نتیجہ ہے۔

انہوں نے کہا کہ بیرون ملک پاکستانیوں کی ترسیلات زر، خدمات کی برآمدات، کرنٹ اکاؤنٹ کی صورتحال میں بہتری اور مالیاتی نظم و ضبط نے ملکی زرمبادلہ کی پوزیشن مضبوط بنانے میں کردار ادا کیا۔

حالیہ اضافے میں بین الاقوامی کیپیٹل مارکیٹ سے پاکستان کی 3 ارب ڈالر کی یورو بانڈ وصولی اور اسٹیٹ بینک کی جانب سے زرمبادلہ کی خریداری بھی اہم عوامل میں شامل رہے۔

وزیراعظم کا کہنا تھا کہ ذخائر میں اضافہ ملک کی بیرونی ادائیگیوں کی صلاحیت کو بہتر بنانے کے ساتھ ساتھ عالمی معاشی دباؤ سے نمٹنے کے لیے بھی مالی گنجائش فراہم کرے گا۔

شہباز شریف نے کہا کہ مضبوط ہوتی بیرونی مالی پوزیشن سے عالمی سرمایہ کاروں کے اعتماد، سرمایہ کاری اور پائیدار معاشی ترقی کے امکانات میں اضافہ ہوسکتا ہے۔

وزیراعظم نے وزیر خزانہ محمد اورنگزیب، گورنر اسٹیٹ بینک، معاشی ٹیم اور بیرون ملک مقیم پاکستانیوں کی کاوشوں کو بھی سراہا۔