“پی ٹی آئی کو اسلام آباد پر دھاوے کی اجازت نہیں دیں گے۔وزیر داخلہ کا دو ٹوک اعلان”

وفاقی وزیر داخلہ محسن نقوی نے پاکستان تحریک انصاف (پی ٹی آئی) کے متوقع احتجاج اور لانگ مارچ کے حوالے سے دوٹوک موقف اپناتے ہوئے واضح کیا ہے کہ دارالحکومت اسلام آباد پر کسی بھی قسم کے دھاوے کی قطعی اجازت نہیں دی جائے گی۔ حکارتی ذرائع اور وزیر داخلہ کے بیانات کے مطابق قانون نافذ کرنے والے اداروں کو 27 ستمبر کے حوالے سے سخت اور واضح ہدایات جاری کر دی گئی ہیں۔

وزیر داخلہ نے خبردار کیا ہے کہ اگر دوسری طرف سے فائرنگ کی گئی تو سکیورٹی ادارے بھی خاموش نہیں بیٹھیں گے۔ انہوں نے دوٹوک انداز میں کہا کہ ہم پہلے سے تنبیہ کر رہے ہیں تاکہ بعد میں کسی کو کوئی گلہ یا شکایت نہ ہو۔ ان کا کہنا تھا کہ اسلام آباد ہائی کورٹ کے صریح احکامات موجود ہیں اور جو بھی عدالتی فیصلوں کی خلاف ورزی کرے گا، اس کے خلاف سب سے پہلے توہین عدالت کا مقدمہ درج کیا جائے گا اور پھر قانون کے دائرے میں رہتے ہوئے ہر ممکن طریقے سے اس راستے کو روکا جائے گا۔

محسن نقوی نے کوہاٹ میں پیش آنے والے ایک افسوسناک واقعے کا حوالہ دیتے ہوئے سیاسی قیادت کو کڑی تنقید کا نشانہ بنایا۔ انہوں نے کہا کہ ایک طرف ملک میں جنازے اٹھائے جا رہے ہیں اور دوسری طرف دھرنوں اور احتجاج کی تیاریاں کی جا رہی ہیں، جو کہ کسی بھی طرح مناسب اور زیب دینے والا رویہ نہیں۔ حکومت امن و امان کی فضا برقرار رکھنے کے لیے پرعزم ہے اور کسی کو بھی ریاستی رٹ چیلنج کرنے کی اجازت نہیں دی جائے گی۔