بھارت میں یمنا ایکسپریس وے پر بس میں آتشزدگی، خاتون سمیت 9 مسافر جاں بحق

بھارت کی ریاست اتر پردیش کے گریٹر نوئیڈا میں یمنا ایکسپریس وے پر ایک دلخراش ٹریفک حادثے کے دوران سلیپر بس میں اچانک آگ بھڑک اٹھی، جس کے نتیجے میں ایک خاتون سمیت 9 مسافر جھلس کر جاں بحق ہو گئے۔ میڈیا رپورٹس اور پولیس حکام کے مطابق یہ حادثہ اس وقت پیش آیا جب بس نوئیڈا سے اتر پردیش کی طرف جا رہی تھی اور اس میں کل 35 افراد سوار تھے۔

ابتدائی تحقیقات اور دستیاب دستاویزات کے مطابق بس میں آگ لگنے کی اصل وجہ اس کے ائیر کنڈیشننگ سسٹم میں ہونے والا دھماکہ تھا، جس کے بعد انجن کے آئل کی وجہ سے آگ نے تیزی سے پوری بس کو اپنی لپیٹ میں لے لیا۔ حادثے کے وقت زیادہ تر مسافر گہری نیند میں سو رہے تھے، تاہم جن مسافروں کو آگ لگنے کا بروقت احساس ہوا انہوں نے اپنی جان بچانے کے لیے کھڑکیوں اور دروازوں سے چھلانگیں لگا دیں۔

واقعے کی اطلاع ملتے ہی پولیس، ریسکیو ادارے اور ایمبولینسیں فوری طور پر جائے وقوعہ پر پہنچ گئیں جنہوں نے امدادی کارروائیاں کرتے ہوئے آگ پر قابو پایا اور جاں بحق ہونے والے افراد کی لاشوں اور زخمیوں کو قریبی اسپتال منتقل کر دیا۔ انتظامیہ کی جانب سے حادثے کی مزید تحقیقات کا سلسلہ جاری ہے۔