آئی فون 18 پرو کی کامیابی کے بعد آئندہ سال براہ راست آئی فون 20 سیریز متعارف کرائے جانے کا امکان
نئے ماڈلز کی لیکس جاری، فولڈ ایبل فون بھی مارکیٹ میں دستیاب ہوگا، منفرد ڈیزائن متوقع
آئندہ سال متوقع آئی فون 20 پرو سیریز کا ایک تصوراتی ڈیزائن اور نئے فیچرز کی جھلک
ٹیکنالوجی کی دنیا کی معروف کمپنی ایپل کی جانب سے حالیہ دنوں آئی فون 18 پرو اور پرو میکس سیریز کے ساتھ ساتھ پہلا فولڈ ایبل فون بھی متعارف کرا دیا گیا ہے، جو عالمی مارکیٹ میں دستیاب ہے۔ ذرائع اور رپورٹس کے مطابق نئے ماڈلز میں متعدد جدید فیچرز شامل کیے گئے ہیں جن میں A20 پرو چپ، جو کہ 2nm (نینو میٹر) کے عمل سے تیار کی گئی ہے، شامل ہے۔
رپورٹس کے مطابق آئی فون 18 پرو 6.3 انچ ڈسپلے جبکہ پرو میکس 6.9 انچ ڈسپلے کے ساتھ پیش کیا گیا ہے۔ اس کے علاوہ دونوں ماڈلز میں 120Hz پرو موشن اور تقریباً 3,000 نِٹس تک کی زیادہ سے زیادہ برائٹنس دی گئی ہے۔ کیمرہ سسٹم میں ویری ایبل اپرچر کے ساتھ نیا 48 میگا پکسل کا مین کیمرہ، الٹرا وائیڈ کیمرہ، ٹیلی فوٹو کیمرہ جو 8 گنا تک آپٹیکل کوالٹی زوم فراہم کرتا ہے اور 18 میگا پکسل فرنٹ کیمرہ شامل کیا گیا ہے۔
اسٹوریج کے حوالے سے 256 جی بی، 512 جی بی، 1 ٹی بی اور 2 ٹی بی کے آپشنز دستیاب ہیں، جبکہ یہ فونز سیاہ، سلور، گلیشیئر اور برگنڈی رنگوں میں پیش کیے گئے ہیں۔ نئے ماڈلز iOS 27 پر چلتے ہیں اور ان میں ایپل انٹیلی جنس اور سری میں بہتری کے علاوہ سیرامک شیلڈ 2 اور تیز رفتار چارجنگ کی سہولت بھی موجود ہے۔ ایپل کے پہلے فولڈ ایبل اسمارٹ فون ‘آئی فون ڈیو’ میں 5.4 انچ کا بیرونی اور 7.6 انچ کا اندرونی ڈسپلے دیا گیا ہے جس کی امریکی مارکیٹ میں قیمت 1,999 ڈالر سے شروع ہوتی ہے۔
دوسری جانب، ابھی آئی فون 18 پرو سیریز کو آئے ہوئے کچھ ہی دن ہوئے ہیں مگر اگلے سال کے نئے آئی فونز کے بارے میں لیکس کا سلسلہ شروع ہو چکا ہے۔ رپورٹس کے مطابق آئندہ سال آئی فونز کو 20 سال مکمل ہو رہے ہیں، اس لیے کمپنی کی جانب سے 19 کی بجائے براہ راست آئی فون 20 سیریز کو پیش کیے جانے کا قوی امکان ہے۔ نئی رپورٹ میں بتایا گیا ہے کہ آئی فون 20 پرو میں 6.41 انچ کا ڈسپلے دیا جائے گا جو کہ آئی فون 18 پرو سے کچھ بڑا ہوگا، جبکہ پرو میکس کا ڈسپلے 6.9 انچ کا ہوگا۔ ڈیزائن کے اعتبار سے بھی بڑی تبدیلیوں کا امکان ہے اور ایپل کی جانب سے بارڈر لیس کواڈ کروڈ اسکرین اور ڈائنامک آئی لینڈ کی جگہ پنچ ہول اسٹائل ڈیزائن استعمال کیا جاسکتا ہے۔ تاہم، اس سیریز کو متعارف کرانے میں ابھی ایک سال کا عرصہ باقی ہے لہذا یہ کہنا قبل از وقت ہوگا کہ یہ تمام تفصیلات حتمی ماڈل کا حصہ ہوں گی یا نہیں۔