سہیل آفریدی کا پشاور سے لکی مروت تک ہیلی کاپٹر میں سفر ضرور سرکاری کام کیلئے ہوگا: محسن نقوی کا طنز

وفاقی وزیر داخلہ محسن نقوی نے وزیراعلیٰ خیبرپختونخوا سہیل آفریدی کی جانب سے لکی مروت جانے کے لیے سرکاری ہیلی کاپٹر کے استعمال پر کڑی تنقید کی ہے۔ وزیر داخلہ نے سماجی رابطے کے پلیٹ فارم ایکس پر اس حوالے سے ایک ویڈیو بھی شیئر کی ہے۔

محسن نقوی نے اپنے طنزیہ بیان میں کہا کہ سہیل آفریدی صاحب کا پشاور سے لکی مروت کا ہیلی کاپٹر کا سفر ضرور سرکاری کام کے لیے ہوگا، اور ممکنہ طور پر اس کا تعلق سکیورٹی صورتحال اور انسداد دہشتگردی کی کوششوں سے ہوگا۔

دوسری جانب گورنر خیبرپختونخوا فیصل کریم کنڈی کا کہنا ہے کہ وفاقی وزیر داخلہ محسن نقوی سے ملاقات کے دوران وزیراعلیٰ کے سرکاری ہیلی کاپٹر کے استعمال پر تفصیلی بات چیت کی گئی ہے۔ گورنر کے مطابق سرکاری وسائل اور ہیلی کاپٹر کا سیاسی لانگ مارچ میں استعمال اسلام آباد ہائیکورٹ کے احکامات کی صریح خلاف ورزی ہے۔

واضح رہے کہ وزیراعلیٰ سہیل آفریدی ایک سیاسی لانگ مارچ کی قیادت کرنے کے لیے سرکاری ہیلی کاپٹر کے ذریعے لکی مروت پہنچے تھے، جس پر سیاسی حلقوں اور وفاقی شخصیات کی جانب سے شدید ردعمل سامنے آیا ہے۔