ٹرمپ کا ایران کے خلاف دوبارہ جنگ کا عندیہ، روس اور چین سے مدد لینے کا امکان مسترد
اہم بیان، امریکی صدر کا طویل المدتی معاہدے کا مطالبہ، چینی و روسی صدور سے شینژن میں ملاقات آج ہوگی۔
ٹرمپ کا ایران کے خلاف دوبارہ جنگ کا عندیہ، روس اور چین سے مدد لینے کا امکان مسترد
واشنگٹن اور شینژن سے موصولہ خبر رساں اداروں کی رپورٹس کے مطابق امریکی صدر ڈونلڈ ٹرمپ نے ایران کے ساتھ ایک ایسا دیرپا معاہدہ طے کرنے کا عزم ظاہر کیا ہے جو مستقبل میں کسی بھی کمزور امریکی صدر کے اقتدار میں آنے کے باوجود برقرار رہے۔ ایک امریکی ٹی وی چینل کو دیے گئے انٹرویو میں صدر ٹرمپ نے واضح کیا کہ جب تک ایران کے ساتھ ایک پائیدار معاہدہ طے نہیں پاتا، امریکی فوجی ایران میں موجود رہیں گے۔
انٹرویو کے دوران امریکی صدر نے دعویٰ کیا کہ ایران کی فوجی صلاحیتوں کو شدید نقصان پہنچ چکا ہے اور اس کی بحریہ، فضائیہ اور فضائی دفاعی نظام کو تباہ کر دیا گیا ہے۔ ان کے مطابق ایران کی میزائل صلاحیت کم ہو کر صرف 12 سے 13 فیصد رہ گئی ہے جبکہ آبنائے ہرمز پر امریکا کا مکمل کنٹرول قائم ہے۔ صدر ٹرمپ نے ایران پر الزام عائد کیا کہ تہران مبینہ طور پر کیمیائی اور حیاتیاتی ہتھیاروں کے حصول یا تیاری کے امکانات کا جائزہ لے رہا ہے، تاہم انہوں نے اپنے اس دعوے کے حق میں کوئی تفصیلی شواہد پیش نہیں کیے۔
جب امریکی صدر سے پوچھا گیا کہ کیا انہیں ایران کے خلاف دوبارہ جنگ شروع کرنے کا فیصلہ کرنا پڑا تو کیا وہ یہی راستہ اختیار کریں گے، تو انہوں نے جواب دیا کہ وہ یقیناً دوبارہ ایسا ہی کریں گے۔ تاہم انہوں نے ایران کے معاملے پر چین اور روس سے کسی قسم کی مدد لینے کا امکان مسترد کرتے ہوئے کہا کہ موجودہ صورتحال میں امریکا کو ایران کے خلاف کارروائیوں کے لیے کسی دوسرے ملک کی معاونت کی ضرورت نہیں۔
دریں اثنا، چین کے شہر شینژن میں امریکی صدر ڈونلڈ ٹرمپ، روسی صدر ولادیمیر پیوٹن اور چینی صدر شی جن پنگ کے درمیان آج ایک تاریخی سہ فریقی ملاقات متوقع ہے۔ ایشیاء پیسیفک اکنامک کوآپریشن (اے پی ای سی) کے سربراہی اجلاس کے موقع پر ہونے والی اس بیٹھک کو عالمی سیاست میں غیر معمولی اہمیت کا حامل قرار دیا جا رہا ہے۔ چین آمد پر صدر شی جن پنگ نے ہوائی اڈے پر امریکی صدر کا پرتپاک استقبال کیا۔
بین الاقوامی میڈیا رپورٹس کے مطابق اس ملاقات کے ایجنڈے میں یوکرین اور ایران کی جنگیں، تجارتی تناؤ، جوہری ہتھیاروں کا پھیلاؤ اور مصنوعی ذہانت کے شعبے میں پیشرفت شامل ہیں۔ مبصرین کے مطابق روسی صدر ولادیمیر پیوٹن کی جانب سے ملاقات کے دوران فروری 2022ء سے جاری یوکرین جنگ کا معاملہ اٹھائے جانے کا امکان ہے، جبکہ صدر ٹرمپ تینوں ممالک کے جوہری ہتھیاروں کے ذخائر میں کمی اور ان کے کنٹرول کے لیے نئے معاہدے پر بات کرنا چاہتے ہیں۔ اعداد و شمار کے مطابق چین کے پاس 600 سے زائد جوہری وار ہیڈز موجود ہیں جبکہ امریکا اور روس دونوں کے پاس 5 ہزار سے زیادہ جوہری وار ہیڈز ہیں۔