وزیراعلیٰ پنجاب کا بابا گرو نانک کے جنم دن پر سکھ یاتریوں کا خیرمقدم

مقدس مقامات کی زیارت، بہترین سہولیات فراہم کی جا رہی ہیں، وزیراعلیٰ پنجاب۔

November 22, 2026 · قومی
وزیراعلیٰ پنجاب کا بابا گرو نانک کے جنم دن پر سکھ یاتریوں کا خیرمقدم

وزیراعلیٰ پنجاب کا بابا گرو نانک کے جنم دن پر سکھ یاتریوں کا خیرمقدم

لاہور: وزیراعلیٰ پنجاب مریم نواز شریف نے بابا گرو نانک کے 557ویں جنم دن کی تقریبات میں شرکت کے لیے پاکستان آنے والے سکھ یاتریوں کو خوش آمدید کہتے ہوئے کہا ہے کہ پاکستان بالخصوص پنجاب امن، محبت، مذہبی رواداری اور بین المذاہب ہم آہنگی کی سرزمین ہے۔

اپنے ایک تہنیتی پیغام میں وزیراعلیٰ پنجاب نے کہا کہ سکھ برادری کے لیے پاکستان میں مقدس مذہبی مقامات کی زیارت کے لیے بہترین سہولیات فراہم کرنا ہماری اولین ذمہ داری ہے۔ بابا گرو نانک امن، محبت اور بھائی چارے کے عظیم علمبردار تھے۔

مریم نواز شریف نے مزید کہا کہ پاکستان آنے والے تمام سکھ یاتری ہمارے معزز مہمان ہیں اور ان کی روایتی مہمان نوازی اور سہولت کاری کے لیے تمام ممکنہ اقدامات کیے جا رہے ہیں۔ سکھ یاتریوں کی آمد پر پرتپاک استقبال پاکستان کی روایتی رواداری کا منہ بولتا ثبوت ہے۔

صوبائی حکومت کی پالیسی کے حوالے سے ان کا کہنا تھا کہ پنجاب حکومت تمام مذاہب کے پیروکاروں کو اپنی مذہبی رسومات کی آزادانہ ادائیگی کے لیے مکمل سازگار ماحول فراہم کرنے کے لیے پرعزم ہے۔ مذہبی سیاحت کا فروغ دراصل پاکستان کے مثبت اور پُرامن تشخص کو دنیا بھر میں اجاگر کرنے کا بہترین ذریعہ ہے۔