ن لیگ کے سوشل میڈیا کنونشن میں”گونوازگو“کے نعرے لگ گئے

لاہور کے کھوکھر پیلس میں ن لیگ کے سوشل میڈیا کنونشن میں لیگی رہنما افضل کھوکھر نے ”گونواز گو“کا نعرہ لگوا دیا۔

میڈیا رپورٹس کےمطابق کھوکھر پیلس میں مسلم لیگ ن کا سوشل میڈیا کنونشن میں مریم نواز،پرویز رشید، مریم اورنگزیب، خرم دستگیر، افضل کھوکھر، عظمیٰ بخاری،عطا اللہ تارڑ، فیصل کھوکھر،سیف کھوکھر اسٹیج پر موجود تھے ۔

سوشل میڈیا کنونشن میں رکن قومی اسمبلی افضل کھوکھر کی زبان پھسل گئی،نواز شریف کے حق میں نعرے لگاتے ہوئے افضل کھوکھر نے ”گو نواز گو“ کانعرہ لگوا دیا۔

 کھوکھر پیلس میں ہونے والی تقریب میں مسلم لیگ ن کی خواتین ورکرز بھی موجود تھیں۔ افضل کھوکھر نے پہلے نوازشریف، مریم نواز، شہباز شریف اور حمزہ شہباز کے نام لے کر زندہ باد کے نعرے لگوائے اور بعد ازاں جوش خطابت میں ان کی زبان پھسل گئی۔

افضل کھوکھر کو جیسے ہی اپنی غلطی کا احساس ہوا انہوں نے’وزیراعظم نوازشریف‘ اور’گو نیازی گو‘ کے نعرے لگوانا شروع کر دیے۔

اس سے قبل بھی پنجاب اسمبلی کے باہر حکومت مخالف نعرے بازی کے دوران لیگی خاتون رکن عظمیٰ بخاری کی زبان پھسل گئی تھی اور انہوں نے ’گو عمران گو‘ کے بجائے ’گو نواز‘ کہہ دیا تھا۔