پاکستان تحریک انصاف (پی ٹی آئی )کے سیکرٹری جنرل اسد عمر نے سندھ میں کراچی اور حیدر آباد ڈویژن کے بلدیاتی الیکشن کے التوا پررد عمل دیتے ہوئے کہا ہے کہ الیکشن کمیشن کی جانب سے صرف 3 دن قبل بلدیاتی انتخاب ملتوی کردیے گئے ہیں اور وجہ صرف بارش بتائی گئی ہے ، یہ ایک مضحکہ خیز بات ہے، الیکشن کمیشن کا نیا فیصلہ سن کر حیرانی ہوئی۔
پی ٹی آئی کے سوشل میڈیا اکاؤنٹ پر اسد عمرکی جانب سے ویڈیو پیغام جاری کیا گیا ہے جس میں انہوں نے بلدیاتی الیکشن کے التوا پرالیکشن کمیشن کو تنقید کا نشانہ بنایا ہے اور کہا ہے کہ عوام الیکشن کمیشن کا نیا فیصلہ سن کر یقیناً حیران ہوگئے ہوں گے،الیکشن کمیشن کس طرح مکمل طور پر جانبدار ہوچکا ہے اور کوئی پاکستانی یقین نہیں کرسکتا کہ اس الیکشن کمیشن کے ہوتے ہوئے صاف شفاف اور غیر جانبدارانہ الیکشن کروائے جاسکیں۔
کراچی و حیدرآباد ڈویژنز میں بلدیاتی انتخاب کے التواء کا الیکشن کمیشن آف پاکستان کا فیصلہ, سیکرٹری جنرل پاکستان تحریک انصاف @Asad_Umar کا ردعمل- #تحریک_انصاف_سے_ڈر_گئے pic.twitter.com/CUT14VJDjG
— PTI (@PTIofficial) July 21, 2022
اسد عمر کا کہنا تھا کہ پی ڈی ایم کی جماعتیں بھاگی بھاگی گئی تھیں کہ ہمیں بچاؤ کیوں کہ وہ دیکھ چکی تھیں کہ جس طرح سے 17 جولائی کو پنجاب میں بلا چلا اس خوف سے یہ بھاگے لیکن اب یہ بچ نہیں سکتے کیوں کہ قوم نے فیصلہ کرلیا ہے کہ قوم نے اپنی حقیقی آزادی لے کر رہنی ہے۔