مادر وطن کی ڈائمنڈ جوبلی جوش و جذبے کیساتھ منانے کیلئے تیاریاں مکمل

لاہور:مادر وطن کی ڈائمنڈ جوبلی (کل ) اتوار کو ایک نئے جوش و جذبے کے ساتھ منانے کیلئے تمام تیاریاں مکمل ہیں تاکہ ایک آزاد ملک میں رہنے کے احساس سے لطف اٹھایا جا سکے۔

دن کا آغاز وفاقی دارالحکومت میں 31 اور صوبائی دارالحکومتوں میں 21-21 توپوں کی سلامی سے ہو گا، مساجد میں نماز فجر کے بعد ملک کی خوشحالی، یک جہتی اور امن کیلئے خصوصی دعائیں کی جائیں گی۔

ملک کے تمام شہروں میں پرچموں، بیجز اور اسٹیکرز کے علاوہ بچوں بڑوں کے کپڑوں کے سٹال قائم کئے گئے ہیں، سرکاری عمارتوں پر قومی پرچم لگایا گیا ہے، مختلف سرکاری اور نجی عمارتوں کوبھی رنگا رنگ روشنیوں سے سجایا گیا ہے، سکول، کالج اور نجی شعبے کے علاوہ سرکاری ادارے اور نجی تنظیمیں مختلف تقریبات کا اہتمام کریں گی۔

بچے اپنے گھروں کو سجانے کیلئے بیجز اور جھنڈیاں خرید رہے ہیں جبکہ نوجوان اپنی کاروں اور موٹرسائیکل پر لگانے کیلئے بڑے جھنڈے خرید رہے ہیں۔