سری لنکن ٹیم کے دو کھلاڑیوں کا وطن واپسی کا فیصلہ

راولپنڈی: پاکستان میں موجود سری لنکن ٹیم کے دو کھلاڑیوں نے وطن واپسی کا فیصلہ کیا ہے۔ دونوں کھلاڑی بیماری کے باعث  وطن واپس جا رہے ہیں۔

سری لنکا کرکٹ کی جانب سے جاری بیان کے مطابق سری لنکن کرکٹ ٹیم کے کپتان چرِتھ اسالانکا اور فاسٹ بولر اسیٹھا فرنینڈو بیماری کے باعث وطن واپس جا رہے ہیں۔ دونوں کھلاڑی آنے والی ٹرائی سیریز (جس میں پاکستان، سری لنکا اور زمبابوے شامل ہیں) میں شرکت نہیں کریں گے۔

ٹیم مینجمنٹ کے مطابق یہ فیصلہ احتیاطی طور پر کیا گیا ہے تاکہ دونوں کھلاڑی مناسب طبی نگہداشت حاصل کر سکیں اور آئندہ مصروف شیڈول سے پہلے مکمل فٹنس بحال کر لیں۔

سری لنکن بورڈ کی جانب سے ٹرائی سیریز کیلئے اسالانکا کی عدم دستیابی کے بعد داسن شاناکا کو  سری لنکا کا کپتان مقرر کر دیا گیا ہے۔ جب کہ پیون رتھ نائیکے کو ٹی20 اسکواڈ میں بطور متبادل شامل کر لیا گیا ہے۔