عالمی معیشت مشکل مرحلے میں داخل،مہنگائی کا دباؤ برقرار

انسٹیٹوٹ آف انٹرنیشنل فنانس (آئی آئی ایف) نے اپنی نئی رپورٹ میں خبردار کیا ہے کہ عالمی معیشت ایک زیادہ محدود، غیر یقینی اور مشکل مرحلے میں داخل ہو رہی ہے۔

رپورٹ کے مطابق دنیا کو اس وقت تیل کی بڑھتی پیداواری لاگت، غیر یقینی سپلائی چینز اور سخت قرض شرائط جیسے بڑے چیلنجز کا سامنا ہے، جس سے عالمی اقتصادی دباؤ میں اضافہ ہو رہا ہے۔

آئی آئی ایف کا کہنا ہے کہ مہنگائی کے خطرات کو قابو میں رکھنا مسلسل مشکل ہوتا جا رہا ہے، جبکہ توانائی کی قیمتوں میں استحکام کے باوجود جغرافیائی سیاسی کشیدگی اضافی لاگت کا باعث بن رہی ہے۔

رپورٹ میں کہا گیا ہے کہ عالمی سیاسی تنازعات مہنگائی اور شرحِ سود کو بلند رکھنے کے دباؤ کو بڑھا سکتے ہیں، جس سے ترقی پذیر معیشتوں کو زیادہ مشکلات کا سامنا ہوگا۔

آئی آئی ایف کے مطابق امریکا کی معیشت یورپ کے مقابلے میں نسبتاً زیادہ مضبوط دکھائی دیتی ہے، تاہم وہ بھی عالمی دباؤ سے مکمل طور پر محفوظ نہیں۔

رپورٹ میں یہ بھی کہا گیا ہے کہ یورپ کو توانائی کی بلند قیمتوں اور صنعتی سرگرمیوں میں سست روی کے باعث زیادہ معاشی دباؤ کا سامنا ہے۔