جنگی کشیدگی برقرار، عالمی منڈی میں پٹرول اور ڈیزل کی قیمتوں پر دباؤ برقرار رہنے کا امکان

عالمی توانائی کی منڈی میں جاری کشیدگی اور سپلائی سے متعلق مسائل کے باعث پٹرول، ڈیزل اور دیگر ریفائنڈ ایندھن کی قیمتوں میں مزید اضافے کا خدشہ ظاہر کیا جا رہا ہے۔

بین الاقوامی تیل کمپنیوں کے مطابق رواں سال کے دوسرے نصف میں ایندھن کی عالمی قیمتیں بلند رہ سکتی ہیں۔ ان کا کہنا ہے کہ ذخائر میں کمی، بعض بڑے برآمد کنندگان کی جانب سے محدود سپلائی اور ریفائنریوں میں فنی رکاوٹوں کے باعث عالمی منڈی دباؤ کا شکار ہے۔

کمپنیوں کے مطابق دوسری سہ ماہی کے دوران ریفائننگ کے شعبے میں بہتر مالی نتائج سامنے آئے۔ ایک کمپنی نے ڈیزل کی ریکارڈ پیداوار حاصل کی، جبکہ دوسری نے اپنی ریفائنریوں میں یومیہ 10 لاکھ بیرل سے زائد خام تیل پراسیس کرنے کا ریکارڈ قائم کیا۔

توانائی کے شعبے سے وابستہ ماہرین کا کہنا ہے کہ جب تک خام تیل کی سپلائی مکمل طور پر معمول پر نہیں آتی اور عالمی شپنگ راستے بحال نہیں ہوتے، ایندھن کی قیمتوں پر دباؤ برقرار رہنے کا امکان ہے۔

ماہرین کے مطابق اگر عالمی منڈی میں یہی صورتحال برقرار رہی تو اس کے اثرات نہ صرف توانائی کے شعبے بلکہ عالمی معیشت، ٹرانسپورٹ، صنعتوں اور عام صارفین پر بھی پڑ سکتے ہیں۔