ایشین گیمز والی بال میں پاکستان کی فتح۔ اسکواش میں تمغے حاصل

ایشین گیمز میں پاکستان کے قومی دستے نے شاندار کارکردگی کا مظاہرہ کرتے ہوئے مختلف کھیلوں میں نمایاں کامیابیاں حاصل کی ہیں۔ اوکازاکی چوو سوگو پارک جمنیزیم میں کھیلے گئے والی بال کے پول اے کے افتتاحی میچ میں پاکستان نے قازقستان کو 1-3 سے شکست دے دی۔ قومی ٹیم نے تیسرا سیٹ ہارنے کے بعد شاندار کم بیک کرتے ہوئے 16-25، 22-25، 25-17 اور 20-25 کے اسکور سے فتح اپنے نام کی۔ اس کامیابی میں مراد خان 21 پوائنٹس کے ساتھ نمایاں رہے، جن میں 17 کامیاب سپائیکس اور 4 بلاکس شامل تھے۔ ان کے علاوہ عثمان فریاد علی نے 14، جہان مراد نے 11 اور مصور خان نے 9 پوائنٹس کا حصہ ڈالا۔

اسکواش کے کورٹ میں 17 سال بعد تاریخی کامیابی حاصل کرتے ہوئے ناگویا کنجو فوٹو ارینا میں مردوں کے سنگلز کے تیسری پوزیشن کے پلے آف میں نور زمان نے ہم وطن محمد عصب عرفان کو مسلسل 3 گیمز میں شکست دی۔ انہوں نے 26 منٹ تک جاری رہنے والے اس میچ میں 7-11، 7-11 اور 3-11 سے کامیابی حاصل کی۔ دونوں کھلاڑیوں کے سیمی فائنل میں پہنچنے پر کانسی کے تمغے پہلے ہی یقینی ہو چکے تھے، جس سے پاکستان کے مجموعی تمغوں کی تعداد 4 ہو گئی ہے۔

دوسری جانب کرکٹ کے میدان میں، جاپان کے شہر نیشّن کے کوروجی اسپورٹس پارک میں پاکستان اور ہانگ کانگ کے درمیان شیڈول پہلا کوارٹر فائنل میچ مسلسل بارش کے باعث منسوخ کر دیا گیا۔ بارش کے باعث میچ کا ٹاس بھی ممکن نہ ہو سکا اور ایک بھی گیند نہ پھینکی جا سکی۔ منتظمین کے مطابق بہتر عالمی رینکنگ کی بنیاد پر پاکستان کرکٹ ٹیم بلا مقابلہ سیمی فائنل میں پہنچ گئی ہے۔ ہاکی کے میدان میں قومی ٹیم کو ملائیشیا کے ہاتھوں 4-5 سے شکست کا سامنا کرنا پڑا، اور اب سیمی فائنل میں رسائی کے لیے پاکستان کا مقابلہ عمان سے ہوگا۔