نئی دہلی کے حساس علاقے میں موبائل انٹرنیٹ سروس عارضی طور پر معطل

نئی دہلی: انڈیا کی وزارتِ داخلہ نے دارالحکومت نئی دہلی کے ایک حساس علاقے میں موبائل انٹرنیٹ سروس عارضی طور پر معطل کرنے کی منظوری دے دی ہے۔

دہلی پولیس کے سپیشل سیل کی جانب سے جاری کردہ مراسلے کے مطابق جن پتھ اور کرتیویہ پتھ کے چوراہے کے گرد 4 کلومیٹر کے دائرے میں تمام موبائل انٹرنیٹ سروسز بند رہیں گی۔ مراسلے کے مطابق پابندی 9 اکتوبر کی رات 10 بجے سے 10 اکتوبر کی رات 10 بجے تک نافذ رہے گی۔ حکام نے تمام ٹیلی کام کمپنیوں کو ہدایت جاری کی ہے کہ مقررہ علاقے میں موبائل انٹرنیٹ کی تمام اقسام اور ٹیکنالوجیز عارضی طور پر معطل کر دی جائیں۔

سرکاری ذرائع کے مطابق وزارتِ داخلہ نے انٹرنیٹ سروس کی معطلی کی وجوہات کے بارے میں فوری طور پر مزید تفصیلات جاری نہیں کی ہیں۔ تاہم متعلقہ دستاویز میں کہا گیا ہے کہ وزارتِ داخلہ نے ٹیلی کمیونیکیشن ایکٹ 2023 اور متعلقہ قواعد کے تحت تمام موبائل انٹرنیٹ ٹیکنالوجیز کی عارضی معطلی کی منظوری دی ہے۔ اس سلسلے میں ایئرٹیل، جیو، ووڈافون آئیڈیا اور ایم ٹی این ایل سمیت تمام بڑی ٹیلی کام کمپنیوں کو فوری طور پر ان احکامات پر عمل درآمد کرنے کی سخت ہدایت کی گئی ہے۔