بیرون ملک پاکستانیوں کی ترسیلات زر میں شاندار اضافہ، زرمبادلہ کے ذخائر بھی بہتر

کراچی (نیوز ڈیسک) بیرون ملک مقیم پاکستانیوں کی جانب سے رقوم کی ترسیل کا سلسلہ تسلسل کے ساتھ جاری ہے، اور ستمبر میں اوورسیز پاکستانیوں نے 3 ارب 60 کروڑ ڈالر پاکستان بھیجے۔

اسٹیٹ بینک آف پاکستان کی جانب سے جاری کردہ ماہانہ اور سہ ماہی اعداد و شمار کے مطابق، ستمبر میں ترسیلات زر کی آمد میں سالانہ بنیادوں پر 12.7 فیصد اضافہ ریکارڈ کیا گیا، اگرچہ اگست کے مقابلے میں ان میں 1.9 فیصد کی معمولی کمی دیکھی گئی۔ مرکزی بینک کی جاری کردہ رپورٹ کے مطابق مالی سال 27-2026 کی پہلی سہ ماہی یعنی جولائی سے ستمبر کے دوران ترسیلات زر میں مجموعی طور پر سالانہ بنیادوں پر 14 فیصد اضافہ ہوا اور یہ حجم 10 ارب 87 کروڑ ڈالر تک پہنچ گیا۔

سرکاری اعداد و شمار کے مطابق ستمبر کے دوران سعودی عرب میں مقیم پاکستانیوں نے 89 کروڑ 91 لاکھ ڈالر وطن بھیج کر پہلا نمبر حاصل کیا، جو گزشتہ سال کے اسی عرصے کے مقابلے میں 19.7 فیصد زیادہ ہیں۔ اس کے علاوہ متحدہ عرب امارات سے 74 کروڑ 85 لاکھ ڈالر، برطانیہ سے 52 کروڑ ڈالر اور امریکا سے 30 کروڑ ڈالر پاکستان منتقل کیے گئے۔

دوسری جانب ملک کے زرمبادلہ کے ذخائر میں بھی ڈیڑھ کروڑ ڈالر کا اضافہ ریکارڈ کیا گیا ہے، جس کے بعد زرمبادلہ کے ذخائر کا مجموعی حجم 26 ارب 80 کروڑ ڈالر کی سطح پر پہنچ گیا ہے۔ مرکزی بینک کے فراہم کردہ اعداد و شمار کے مطابق 2 اکتوبر 2026 کو ختم ہونے والے ہفتے کے دوران اسٹیٹ بینک کی تحویل میں موجود ذخائر کی مالیت 21 ارب 45 کروڑ 37 لاکھ ڈالر رہی جبکہ کمرشل بینکوں کے پاس 5 ارب 34 کروڑ 37 لاکھ ڈالر کے ذخائر موجود ہیں۔ معاشی ماہرین نے ان اعداد و شمار کو ملکی معیشت کے استحکام کے لیے خوش آئند قرار دیا ہے۔