امریکی ریاست پنسلوانیا میں فائرنگ کا المناک واقعہ، بچوں سمیت 9 افراد ہلاک

ایری: امریکی ریاست پنسلوانیا کے شہر ایری میں فائرنگ کے ایک المناک واقعے میں2 بچوں سمیت 9 افراد ہلاک ہوگئے۔ پولیس نے موقع پر پہنچ کر کارروائی کی جبکہ مبینہ حملہ آور بھی مردہ پایا گیا۔

امریکی خبر رساں ادارے ایسوسی ایٹڈ پریس (اے پی) کے مطابق، پولیس کو شام تقریباً 5 بجے پیری اسٹریٹ کے علاقے میں فائرنگ کی اطلاع موصول ہوئی۔ عینی شاہدین نے بتایا کہ ایک مسلح شخص کو اندھا دھند فائرنگ کرتے ہوئے دیکھا گیا، جو بعد میں ایک قریبی گھر میں داخل ہو گیا۔

پولیس ذرائع کے مطابق، جب اہلکار موقع پر پہنچے تو دو خواتین کی لاشیں گھر کے باہر پڑی ملیں، جبکہ دیگر متاثرین کی لاشیں گھر کے اندر سے برآمد ہوئیں۔ ہلاک ہونے والوں میں دو معصوم بچے بھی شامل ہیں۔

ایری کے پولیس چیف رک لوراہ نے اس واقعے کو انتہائی افسوس ناک اور دل دہلا دینے والا قرار دیا۔ انہوں نے اپنے 28 سال سے زائد کے طویل کیریئر کا حوالہ دیتے ہوئے کہا کہ انہوں نے اپنی پوری نوکری میں اس نوعیت کا کوئی خوفناک سانحہ نہیں دیکھا۔

پولیس نے تفتیش کے دوران مشتبہ حملہ آور کو بھی مردہ حالت میں پایا، اور ابتدائی اطلاعات کے مطابق حملہ آور نے فائرنگ کے اس خونی کھیل کے بعد خود کو گولی مار کر خودکشی کر لی تھی۔ علاقے میں خوف و ہراس کی فضا پھیل گئی ہے جبکہ پولیس واقعے کے محرکات جاننے کے لیے مزید تحقیقات کر رہی ہے۔