ریاض ایئرپورٹ پر حوثیوں کے حملے کی اقوام متحدہ کے سیکریٹری جنرل کی شدید مذمت

اقوام متحدہ کے سیکریٹری جنرل انتونیو گوتریس نے سعودی عرب کے دارالحکومت ریاض میں شاہ خالد انٹرنیشنل ایئرپورٹ پر حوثیوں کے حملے کی سخت مذمت کرتے ہوئے شہریوں اور اہم تنصیبات کو نشانہ بنانے پر تشویش کا اظہار کیا ہے۔

سماجی رابطے کی ویب سائٹ ایکس پر جاری بیان میں انتونیو گوتریس نے کہا کہ ہفتے کے روز ریاض ایئرپورٹ پر ہونے والے حملے کی اطلاعات پر انہیں گہرا صدمہ پہنچا ہے۔ انہوں نے شہریوں اور شہری تنصیبات پر حملوں کو ناقابل قبول قرار دیتے ہوئے ان کی فوری روک تھام پر زور دیا۔

اقوام متحدہ کے سربراہ کے بیان کے مطابق، اطلاعات میں حملے کے نتیجے میں 12 افراد کی ہلاکت اور سیکڑوں شہریوں کے زخمی ہونے کا ذکر کیا گیا ہے۔ انہوں نے کہا کہ شہریوں اور شہری تنصیبات کو نشانہ بنانا بین الاقوامی قانون کی خلاف ورزی ہے اور ایسے حملے فوری طور پر بند ہونے چاہییں۔

انتونیو گوتریس کا یہ بیان ایسے وقت میں سامنے آیا ہے جب ریاض ایئرپورٹ پر حملے کے بعد سعودی عرب کی حمایت میں مختلف ممالک کی جانب سے مذمتی بیانات جاری کیے جا رہے ہیں۔

اقوام متحدہ کے سیکریٹری جنرل نے ایک بار پھر زور دیا کہ شہریوں اور اہم تنصیبات کو نشانہ بنانے والے حملے فوری طور پر روکے جائیں۔