حوثیوں کا عدن ایئرپورٹ اور سعودی فوجی کمانڈ سینٹر کو نشانہ بنانے کا دعویٰ

عالمی خبر رساں ادارے اے ایف پی کے مطابق جمعے کے روز عدن ایئرپورٹ کے قریب زور دار دھماکوں کی آوازیں سنی گئیں، جنہیں وہاں موجود صحافیوں نے بھی محسوس کیا۔ بعد ازاں علاقے میں دو میزائل گرنے کی اطلاعات سامنے آئیں۔

حوثیوں کا کہنا ہے کہ میزائل سعودی فوجی کمانڈ سینٹر کو نشانہ بنانے کے لیے داغے گئے تھے۔ ان کے مطابق یہ مرکز عدن ایئرپورٹ کے قریب واقع ہے اور سعودی حمایت یافتہ یمنی حکومت کے زیر انتظام علاقے میں قائم ہے۔ تاہم حملے کے ہدف سے متعلق اس دعوے کی آزادانہ تصدیق سامنے نہیں آئی۔

واضح رہے کہ عدن یمن کی بین الاقوامی طور پر تسلیم شدہ حکومت کا عبوری دارالحکومت ہے، جبکہ حوثی گروپ ملک کے شمالی علاقوں پر قابض ہے اور یمنی حکومت کے ساتھ سعودی اتحاد کی حمایت یافتہ قوتوں کے خلاف برسرِپیکار ہے۔

میزائل گرنے کے تازہ واقعے میں جانی نقصان یا املاک کو پہنچنے والے نقصان کے بارے میں تاحال تفصیلات سامنے نہیں آئی ہیں۔

اس واقعے سے ایک روز قبل بھی عدن میں صدارتی محل کے احاطے پر حوثیوں کے حملے کی اطلاع سامنے آئی تھی۔ یمنی حکام کے مطابق اس حملے میں پانچ افراد جاں بحق اور 16 زخمی ہوئے تھے۔