حوثیوں کی مدینہ منورہ کی جانب ڈرون بھیجنے کی تردید

صنعا: یمن کے حوثی گروپ نے سعودی عرب کے مقدس شہر مدینہ منورہ کی جانب ڈرون بھیجنے اور سعودی سرزمین پر کسی بھی قسم کی فوجی کارروائی میں ملوث ہونے کی تردید کردی ہے۔

خبر رساں ادارے رائٹرز کے مطابق حوثی فوجی ترجمان یحییٰ سریع نے کہا ہے کہ ان کی تنظیم نے نہ مدینہ منورہ کی طرف کوئی ڈرون بھیجا اور نہ ہی سعودی عرب کے خلاف کوئی فوجی کارروائی کی۔
حوثیوں کا یہ بیان سعودی قیادت میں قائم اتحاد کے اس دعوے کے بعد سامنے آیا ہے جس میں کہا گیا تھا کہ سعودی فضائی دفاعی نظام نے مدینہ منورہ اور مملکت کے مشرقی علاقے کی فضائی حدود میں پانچ ڈرونز کو روک کر تباہ کردیا۔
سعودی اتحاد کے مطابق ڈرونز کو فضائی حدود میں ہی نشانہ بنایا گیا، تاہم حوثی گروپ نے اس دعوے کو مسترد کرتے ہوئے واقعے میں اپنے ملوث ہونے سے انکار کیا ہے۔
تاحال دونوں فریقوں کے بیانات میں تضاد موجود ہے، جبکہ ڈرونز کی اصل شناخت اور انہیں بھیجنے والوں کے بارے میں آزادانہ تصدیق سامنے نہیں آئی۔
یہ پیش رفت ایسے وقت میں سامنے آئی ہے جب مشرق وسطیٰ میں علاقائی کشیدگی اور یمن سے متعلق سلامتی کے خدشات برقرار ہیں۔