اردنی فضائیہ کے جنوبی شام میں شدت پسندوں کے ٹھکانوں پر حملے

اردن کی فضائیہ نے جنوبی شام میں شدت پسند تنظیموں کے ٹھکانوں کو نشانہ بنانے کا دعویٰ کیا ہے۔ اردنی فوج کے ترجمان کے مطابق کارروائی کے دوران متعدد جنگجو ہلاک اور زخمی ہوئے۔

اردنی حکام کا کہنا ہے کہ یہ کارروائی جنوبی شہر کرک میں گرجا گھر پر ہونے والے حملے میں ملوث عناصر کے خلاف کی گئی۔ حکام کے مطابق نشانہ بنائے گئے گروہوں کا تعلق اس حملے کے ملزمان سے بتایا جاتا ہے۔

دوسری جانب شام نے اپنی سرزمین پر اردن کی جانب سے کی جانے والی فوجی کارروائی پر تحفظات کا اظہار کیا ہے۔ شامی حکام کے مطابق کارروائی سے قبل اردن نے دمشق سے رابطہ نہیں کیا۔ اطلاعات کے مطابق دونوں ممالک کے درمیان ایک سرحدی گزرگاہ بھی آج بند رہے گی۔

واضح رہے کہ اردن کے جنوبی شہر کرک میں گرجا گھر پر دہشت گرد حملے کے نتیجے میں 9 افراد ہلاک ہوئے تھے۔ اردنی حکام نے شام میں حالیہ کارروائی کو اسی حملے میں ملوث عناصر کے خلاف جوابی اقدام قرار دیا ہے۔