اعلیٰ عدلیہ بانی پی ٹی آئی کے خط کا فوری نوٹس لے، بیرسٹر گوہر
اہم ملاقات، طبی سہولیات پر شدید تحفظات، حکومت کا مؤقف مسترد، نفاذ فوری ہوگا۔
اعلیٰ عدلیہ بانی پی ٹی آئی کے خط کا فوری نوٹس لے، بیرسٹر گوہر
اسلام آباد (نیوز ڈیسک) پاکستان تحریک انصاف کے چیئرمین بیرسٹر گوہر خان نے اپوزیشن لیڈر سینیٹ علامہ راجہ ناصر عباس سے اہم ملاقات کی ہے، جس میں موجودہ سیاسی صورتحال اور بانی پی ٹی آئی کی جیل میں صحت سے متعلق امور پر تفصیلی تبادلہ خیال کیا گیا۔ تحریک انصاف کے جاری کردہ اعلامیے کے مطابق ملاقات کے دوران بیرسٹر گوہر نے علامہ راجہ ناصر عباس کو بانی پی ٹی آئی سے ہونے والی ملاقات کے حوالے سے تمام تفصیلات سے آگاہ کیا اور موجودہ ملکی حالات پر اعتماد میں لیا۔
ترجمان پی ٹی آئی کے مطابق رہنماؤں نے اس بات کا شدید مطالبہ کیا کہ اعلیٰ عدلیہ بانی پی ٹی آئی کی جانب سے چیف جسٹس پاکستان، چیف جسٹس وفاقی آئینی عدالت اور چیف جسٹس اسلام آباد ہائی کورٹ کے نام لکھے گئے خط کا فوری نوٹس لے۔ قائدین کا کہنا تھا کہ بانی پی ٹی آئی کی صحت اور طبی سہولیات سے متعلق تحفظات کو فوراً دور کیا جائے اور انہیں قانون و آئین کے مطابق تمام بنیادی انسانی حقوق فراہم کیے جائیں۔ رہنماؤں نے مطالبہ کیا کہ بانی پی ٹی آئی کی ان کے اہل خانہ اور وکلا سے ملاقاتیں بلا رکاوٹ یقینی بنائی جائیں اور سپریم کورٹ کے 18 اگست 2026ء کے فیصلے پر من و عن عمل درآمد کیا جائے۔ اعلامیے میں مزید کہا گیا کہ بانی پی ٹی آئی کو فوری طور پر شفا انٹرنیشنل اسپتال اسلام آباد منتقل کرکے مکمل طبی سہولیات فراہم کی جائیں اور عدالتی احکامات پر بلا تاخیر عمل درآمد یقینی بنایا جائے۔
دوسری جانب صوبائی وزیر اطلاعات پنجاب عظمیٰ بخاری نے ایک پریس کانفرنس اور جاری کردہ بیان میں بانی پی ٹی آئی کو جیل میں طبی سہولیات نہ ملنے کے شکوے کو سراسر بے بنیاد اور جھوٹ پر مبنی قرار دیا ہے۔ سرکاری دستاویزات اور حکومتی مؤقف کے مطابق سابق وزیراعظم کا اڈیالہ جیل میں قید کے دوران 8 مرتبہ باقاعدہ طبی ماہرین نے معائنہ کیا ہے، جبکہ جیل میں موجود میڈیکل عملہ روزانہ 3 مرتبہ ان کے بنیادی طبی اشارے چیک کرتا ہے۔
عظمیٰ بخاری کے مطابق اگست 2024 میں ماہر امراض قلب نے بانی پی ٹی آئی کا معائنہ کرکے ادویات تجویز کیں، فروری 2026 میں 5 رکنی میڈیکل ٹیم نے آنکھوں اور بلڈ پریشر کا معائنہ کیا، جبکہ 10 اگست 2026 کو 4 رکنی میڈیکل بورڈ نے معائنہ کرکے بلڈ پریشر کی دوا تبدیل کی۔ حکومتی اعداد و شمار کے مطابق 20 اور 21 اگست 2026 کی درمیانی شب انہیں پمز ہسپتال منتقل کیا گیا جہاں آنکھوں کے ماہرین نے فٹنس رپورٹ مرتب کی۔ ستمبر 2026 میں پمز اور شفا آئی ہسپتال کے ڈاکٹروں نے جیل میں معائنہ کیا، جبکہ 10 اور 11 نومبر 2026 کی درمیانی شب فالو اپ علاج کے لیے پمز ہسپتال لایا گیا جہاں آنکھوں کے ماہرین نے اینٹی وی ای جی ایف انجیکشن لگایا۔ میڈیکل ٹیموں میں ڈاکٹر عارف خان، ڈاکٹر فرقاد عالمگیر، ڈاکٹر ندیم قریشی اور ڈاکٹر اختر علی بندیشہ سمیت ذاتی معالجین ڈاکٹر عاصم یوسف اور فیصل سلطان بھی علاج کے عمل سے وابستہ رہے۔ بشریٰ بی بی کی جانب سے سیل میں سانپ اور چوہے نکلنے کے دعوے کو بھی حکومت نے مسترد کر دیا۔