پی ٹی آئی اندرونی انتشار کا شکار ہے، بانی کو کیا چھڑائیں گے، خواجہ آصف

وزیر دفاع کی پی ٹی آئی قیادت پر سخت تنقید، سیاسی دکانداری چمکانے اور مکافاتِ عمل کا الزام

November 17, 2026 · قومی

پی ٹی آئی اندرونی انتشار کا شکار ہے، بانی کو کیا چھڑائیں گے، خواجہ آصف

وفاقی وزیر دفاع خواجہ آصف نے پاکستان تحریک انصاف (پی ٹی آئی) کی قیادت پر شدید تنقید کرتے ہوئے کہا ہے کہ پوری پارٹی اندرونی طور پر ایک دوسرے سے دست و گریباں ہے، ایسے میں یہ لوگ بانی پی ٹی آئی کو کیا چھڑائیں گے۔

خواجہ آصف نے پی ٹی آئی رہنماؤں لطیف کھوسہ اور سلمان اکرم راجہ کے ایک دوسرے کے خلاف بیانات پر ردعمل دیتے ہوئے کہا کہ یہ تمام رہنما دراصل یہی چاہتے ہیں کہ بانی پی ٹی آئی جیل میں ہی رہیں تاکہ ان کی سیاسی دکانداری چلتی رہے۔ ان کا کہنا تھا کہ ایسے حمایتی اور پارٹی رہنما بانی پی ٹی آئی کے لیے قید سے بھی بڑی سزا بن چکے ہیں۔

وزیر دفاع نے بانی پی ٹی آئی کی جانب سے طبی بنیادوں پر ریلیف حاصل کرنے کی اپیل پر بھی کڑی تنقید کی۔ انہوں نے کہا کہ جو شخص ماضی میں جیل میں قید سیاسی مخالفین کی بیماریوں کا مذاق اڑایا کرتا تھا، آج وہ خود مکافاتِ عمل کا شکار ہو چکا ہے۔ دوسروں کی تکلیف پر قہقہے لگانے والوں کو یاد رکھنا چاہیے کہ اللہ کی لاٹھی بے آواز ہوتی ہے۔

واضح رہے کہ گزشتہ روز بانی پی ٹی آئی کے وکیل سلمان صفدر نے ان کی ہدایت پر اعلیٰ عدلیہ سے طبی بنیادوں پر ریلیف کے حصول کے لیے اپیل دائر کی تھی۔

دوسری جانب وزیراعظم کے مشیر کا کہنا ہے کہ عمران خان اور بشریٰ بی بی کو ڈاکٹروں کی ہدایات کے مطابق علاج معالجے کی سہولت فراہم کی جائے گی۔

بانی پی ٹی آئی نے اپنے ایک بیان میں کہا ہے کہ ان کا بلڈ پریشر 193 تک پہنچ چکا ہے اور اگر وہ زندہ رہے تو عدالت میں اپنی بے گناہی ثابت کریں گے۔