شمالی وزیرستان میں سکیورٹی فورسز کی کارروائی، خواتین کے بھیس میں فرار ہونے والے دہشتگرد ہلاک

عزم استحکام وژن کے تحت کارروائی، رکشے میں فرار کی کوشش ناکام، اہم تفصیلات سامنے آ گئیں

November 20, 2026 · قومی
شمالی وزیرستان میں سکیورٹی فورسز کی کارروائی، خواتین کے بھیس میں فرار ہونے والے دہشتگرد ہلاک

شمالی وزیرستان میں سکیورٹی فورسز کی کارروائی، خواتین کے بھیس میں فرار ہونے والے دہشتگرد ہلاک

شمالی وزیرستان کے علاقے میر علی میں سکیورٹی فورسز نے ایک کامیاب کارروائی کے دوران خواتین کا بھیس بدل کر فرار ہونے والے خارجی دہشتگردوں کو جہنم واصل کر دیا۔ سکیورٹی ذرائع کے مطابق یہ کارروائی ملک سے دہشتگردی کے خاتمے کے لیے جاری عزم استحکام وژن کے تحت عمل میں لائی گئی۔

سکیورٹی ذرائع کا کہنا ہے کہ خارجی دہشتگردوں کی جانب سے خواتین کا بھیس دھارنا اخلاقی اقدار کے منافی اور خواتین کی حرمت کے استحصال کا بھی واضح باعث ہے۔ بزدل خوارج ایسے گھٹیا ہتھکنڈوں کے ذریعے قانون کی گرفت سے بچنے کی ناکام کوششیں کر رہے ہیں، تاہم سکیورٹی فورسز نے ان کے تمام عزائم کو خاک میں ملا دیا۔

دستاویزات اور سکیورٹی ذرائع کے مطابق ان دہشتگردوں کے مساجد اور شہری آبادی میں چھپنے کے مصدقہ شواہد بھی ملے ہیں جبکہ یہ عناصر اپنے ناپاک مقاصد کے لیے بارودی مواد بھی استعمال کرتے رہے ہیں۔ خیبر پختونخوا میں فتنہ الخوارج کے یہ دہشتگرد اکثر معصوم بچوں اور خواتین کو ڈھال کے طور پر استعمال کرتے ہیں، لیکن سکیورٹی فورسز ملک سے اس ناسور کے مکمل خاتمے تک اپنی کارروائیاں جاری رکھیں گی۔