امریکی خاتون نے رحمان ملک پر جنسی زیادتی کا الزام لگادیا

پاکستان میں مقیم امریکی خاتون سنتھیا رچی نے پیپلز پارٹی کی اعلیٰ قیادت پرگھٹیاالزامات کی بوچھاڑ کردی۔

ایک ویڈیو بیان میں سنتھیا رچی نے پیپلز پارٹی کے رہنما اور سابق وفاقی وزیر داخلہ رحمان ملک پر جنسی زیادتی کرنے کا الزام لگادیا۔

سنتھیا رچی نے الزام لگایا کہ رحمان ملک نے انہیں 2011 میں زیادتی کا نشانہ بنایا جب پاکستان پیپلز پارٹی کی حکومت تھی اور رحمان ملک وزیرداخلہ کے عہدے پر فائز تھے۔

سنتھیا رچی نے سابق وزيراعظم یوسف رضا گیلانی اور سابق وزیر صحت مخدوم شہاب الدین پر بھی دست درازی کا الزام عائدکیا۔

سنتھیا رچی نے کہا کہ یوسف رضا گیلانی نے تب دست درازی کی جب وہ ایوان صدر میں مقیم تھے۔

اس حوالے سے سابق وزیراعظم یوسف رضا گیلانی نے اپنے ردعمل میں کہا کہ خاتون نے شہید بےنظیر پر عجیب وغریب الزامات لگائے، کوئی بھی شہید بی بی پرالزام برداشت نہیں کرسکتا۔

سابق وزیراعظم یوسف رضاگیلانی نے مزید کہا کہ علی حیدرگیلانی اورعلی قاسم اس معاملے پرعدالت میں چلےگئے ہیں، وزیراعظم کےعہدےکاآدمی ایوان صدرمیں کیاایسی حرکت کرسکتاہے؟

یوسف رضاگیلانی نے سوال کیا کہ الزام لگانےوالی خاتون ایوان صدر میں کیا کر رہی تھیں؟ خاتون کو سیاستدانوں پر الزامات لگانےکا حق کس نے دیا؟

یوسف رضا گیلانی نے کہا کہ خاتون کے الزامات کے جوابات دینا توہین ہوگا،شہید بی بی کے دشمن بھی ایسی بات نہیں کرتے، میں ایوان صدر، صدر سے ملنے یا وفود سے ملنے گیاہوں گا، امریکی خاتون کو ایسی بات کرت ہوئے شرم آنی چاہیے۔

سینیٹر رحمان ملک کے ترجمان نے کہا ہے کہ سابق وزیر داخلہ امریکی خاتون سنتھیا ڈی رچی کے من گھڑت، بیہودہ الزامات کے جوابات دینا اپنی توہین سمجھتے ہیں۔

ترجمان نے کہا کہ سینیٹررحمان ملک نے امریکی خاتون کے بیہودہ و نازیبا الزامات کی سختی سے تردید کی ہے۔ رحمان ملک کے بیٹوں نے امریکی خاتون کے خلاف قانونی کارروائی اور ہتک عزت کا دعوی دائر کرنے کیلئے قانونی رائے مانگ لی ہے، امریکی خاتون کے الزامات بدنیتی پر مبنی ہیں جس کا مقصد سینیٹر رحمان ملک کی ساکھ کو نقصان پہنچانا ہے۔

ترجمان نے مزید کہا کہ سنتھیا نے رحمان ملک کیخلاف نازیبا الزامات کسی مخصوص فرد یا گروہ کے اکسانے پر لگائے ہیں، رحمان ملک نے ہمیشہ بھارت کے کشمیریوں و بھارتی مسلمانوں پر مظالم کیخلاف آواز بلند کی ہے، الزامات اس وقت سامنے آئے جب بحیثیت چئیرمین سینیٹ قائمہ کمیٹی برائے داخلہ امریکی خاتون کے بینظیر کیخلاف لگائے گئے الزامات کا نوٹس لیا۔