افغانستان میں آج عید منائی جا رہی ہے

کابل:افغانستان میں عید الفطرآج مذہبی جوش و جذبے سے منائی جا رہی ہے،طالبان حکومت کے وجود میں آنے کے بعد یہ پہلی عید منائی جا رہی ہے،ملک بھر میں عید کے اجتماعات منعقد ہوئے، لوگ ایک دوسرے  سے عید ملے اور مبارکباد دی۔

افغانستان کی حکومت نے ماہِ شوال 1443 ہجری کا چاند نظر آنے کا اعلان کرتے ہوئے ملک بھر میں آج عید الفطر منانے کا اعلان کردیا۔

افغان میڈیا رپورٹ کے مطابق افغانستان کے مختلف علاقوں سے ماہِ شوال کے چاند کی شہادات موصول ہوئیں جس کے بعد حکومت نے آج عید الفطر منانے کا اعلان کیا۔

افغان طالبان کے ترجمان ذبیح اللہ مجاہد نے بھی چاند نظر آنے کی تصدیق کرتے ہوئے سرکاری اعلامیہ جاری کردیا۔

امارات اسلامیہ افغانستان کے چیف جسٹس اور رویت ہلال کمیٹی کے سربراہ شیخ الحدیث مولوی عبدالحکیم حقانی نے بروز اتوار ملک بھر میں عید الفطر منانے کا اعلان کیا۔انہوں نے عید الفطر کی آمد پر امت مسلمہ اور افغان قوم کو مبارک باد بھی پیش کی۔

واضح رہے کہ سعودی عرب سمیت کسی بھی خلیجی ملک میں عید الفطر کا چاند نظر نہیں آیا، جہاں کل 30واں روزہ رکھا جائے گا اور عید الفطر بروز پیر کو ہوگی۔