گاندھی خاندان پھر زیرعتاب- کینیڈا میں مجسمہ توڑ دیا

اوٹاوا (امت نیوز) بھارت کا گاندھی خاندان ایک بار پھر زیر عتاب آگیا، کینیڈا میں ایک بار پھر مہاتما گاندھی کے مجسمہ کو نقصان پہنچایا گیا۔ رپورٹس کے مطابق کینیڈا کے برطانوی کولمبیا علاقے میں ایک یونیورسٹی کے احاطہ میں موجود مہاتما گاندھی کے مجسمہ کے ساتھ توڑ پھوڑ کی گئی ہے۔ وینکوور میں واقع بھارت کے قونصلیٹ جنرل نے کہا کہ سائمن فریزر یونیورسٹی کے برنابی احاطہ واقع پیس اسکوائر پر لگائی گئی مہاتما گاندھی کی مورتی کو نقصان پہنچایا گیا ہے۔

قونصلیٹ جنرل نے ٹوئٹ میں لکھا ہے کہ ہم امن کے سفیر مہاتما گاندھی جی کی مورتی کو نقصان پہنچانے کے جرم کی سخت مذمت کرتے ہیں۔ قونصلیٹ جنرل نے بیان میں یہ بھی کہا کہ کناڈائی افسران اس معاملے کی فوری تحقیقات کرے اور قصورواروں کو جلد انصاف کے کٹہرے میں لائے۔

واضح رہے کہ اس سے قبل خالصتان حامیوں کے ذریعہ 23 مارچ کو کناڈا کے اونٹاریو واقع ہیملٹن شہر میں سٹی ہال کے پاس مہاتما گاندھی کے مجسمہ کو نقصان پہنچایا گیا تھا اور اس پر اسپرے پینٹ کیا گیا تھا۔ مجسمہ پر خالصتان کی حمایت میں اور بھارت کی مخالفت میں جملے بھی لکھے گئے تھے ہیملٹن کے اس واقعہ کو پولیس نے ہیٹ کرائم قرار دیا تھا۔