کشیدگی کے باعث کویت میں پانی اور اشیائےضروریہ کی طلب بڑھ گئی

کویت میں بجلی اور پانی کے ایک پلانٹ پر مبینہ حملے کے بعد عوام میں تشویش بڑھ گئی ہے، جس کے باعث پانی اور اشیائے ضروریہ کی خریداری میں نمایاں اضافہ دیکھنے میں آیا ہے۔

کویت نے ہفتے کے روز دوسری مرتبہ ایران پر ملک کے بجلی اور پانی کے پلانٹ کو نشانہ بنانے کا الزام عائد کیا، جس کے بعد شہری ممکنہ طور پر بنیادی سہولیات اور سپلائی چین متاثر ہونے کے خدشات کا اظہار کر رہے ہیں۔

خبر رساں ادارے اے ایف پی سے گفتگو کرتے ہوئے 61 سالہ شہری حسن ریان نے کہا کہ “آج صبح سے پانی اور ڈبہ بند خوراک کی طلب میں نمایاں اضافہ ہوا ہے کیونکہ لوگوں کو خدشہ ہے کہ اگر کشیدگی برقرار رہی تو خدمات اور اشیائے ضروریہ کی فراہمی متاثر ہو سکتی ہے۔”

ایک اور شہری علی محمود نے بتایا کہ اگرچہ آج سرکاری تعطیل تھی، اس کے باوجود سڑکیں اور ساحلی علاقے غیر معمولی طور پر سنسان دکھائی دیے، جس سے عوام میں پائی جانے والی تشویش واضح ہوتی ہے۔