امریکا اور اسرائیل کو شکست دینے تک پیچھے نہیں ہٹیں گے، ایرانی فوج

تہران: ایرانی فوج نے امریکا اور اسرائیل کے خلاف مزاحمت جاری رکھنے کا اعلان کرتے ہوئے کہا ہے کہ ملکی مفادات اور عوام کے حقوق کے تحفظ کے لیے کوششیں جاری رکھی جائیں گی۔

ایرانی فوج کے مطابق موجودہ حالات میں ملک کے دفاع اور قومی مفادات کا تحفظ اولین ترجیح ہے۔ فوج کا کہنا ہے کہ ایران کسی بھی دباؤ کے سامنے پیچھے نہیں ہٹے گا اور اپنی پالیسیوں پر قائم رہے گا۔

ایرانی فوج نے اپنے بیان میں کہا کہ ایرانی عوام کے مفادات کا ہر ممکن تحفظ یقینی بنایا جائے گا۔ فوج کے مطابق عوام کے جائز مطالبات کو بھی نظر انداز نہیں کیا جائے گا اور ملکی مفادات کے تحفظ کے لیے جدوجہد جاری رکھی جائے گی۔

دوسری جانب ایرانی حکام نے قطر میں پائلٹوں سے متعلق تحقیقات کے معاملے پر بھی تحفظات کا اظہار کیا ہے۔ ایرانی مؤقف کے مطابق قطر نے ایرانی ماہرین پر مشتمل تحقیقاتی ٹیم کو ملک میں داخل ہونے کی اجازت نہیں دی۔

ایرانی حکام کا کہنا ہے کہ ماہرین کی ایک کمیٹی پائلٹوں سے متعلق معاملے کی تحقیقات کے لیے قطر جانے کی اجازت کی منتظر ہے۔ ایران نے قطر سے مطالبہ کیا ہے کہ ایرانی ماہرین کو تحقیقات کے لیے ملک آنے کی اجازت دی جائے۔

ایرانی حکام کے مطابق تحقیقات کے لیے ماہرین کی ٹیم کو قطر بھیجنے کی کوشش کئی ماہ سے جاری ہے، تاہم تاحال اس حوالے سے اجازت نہیں مل سکی۔

ایران نے اس معاملے پر قطر سے تعاون کی توقع ظاہر کرتے ہوئے کہا ہے کہ متعلقہ ماہرین کو تحقیقات میں شامل ہونے کا موقع دیا جانا چاہیے تاکہ معاملے کے حقائق سامنے لائے جاسکیں۔